«Бу ерда носоғлом муҳит ҳукм сурмоқда». Болалар омбудсмани Самарқанддаги 63-сонли мактаб-интернатдаги вазиятни ўрганди

Самарқанд вилояти Оқдарё туманидаги 63-сонли ихтисослашган мактаб-интернатдаги юз-кўзлари кўкарган, йиртиқ-ямоқ кийимларда юрган ва кир юваётган болалар суратлари тарқалганди. Вазият Сенат қўмитаси томонидан назоратга олиниб, ҳолат юзасидан Самарқанд вилояти ҳокимлиги томонидан ишчи гуруҳ тузилганди. Вазият болалар ҳуқуқлари бўйича вакил ўринбосари томонидан назоратга олингани ҳамда ўрганиб чиқилгани маълум қилинди.

Олий Мажлиснинг инсон ҳуқуқлари бўйича вакили (омбудсман) матбуот хизматининг қайд этишича, Самарқанд вилояти ҳокимига ҳолатни ўрганиш ва тўпланган маълумотларни тақдим этиш бўйича сўров юборилган.

Ҳолат 25 май куни бола ҳуқуқлари бўйича вакилнинг Самарқанд вилоятидаги минтақавий вакили Н.Раббимова, Самарқанд вилояти ҳокими Эркинжон Турдимов, туман ҳокими Нажмиддин Сулаймонов, туман прокурори Дилшод Кубаев, туман ИИБ бошлиғи Баҳодир Ибрагимов, вилоят Халқ таълими бошқармаси бошлиғи Зебинисо Шодиева, бошқарманинг масъул ходимлари томонидан ўрганилган.

Минтақавий вакилнинг аниқлашича, Самарқанд вилояти, Оқдарё туманидаги ушбу муассасада тарбияланаётган суратдаги 2 нафар бола отаси томонидан уйига қайтариб олиб кетилган, кўзи кўкарган бола эса 11 март куни тенгдоши билан уришгани ва ўшанда кўзи кўкарганини айтган. Бу ҳолат боланинг тиббий анкетасида ҳам қайд этилган.

Шунингдек, тоғорада кир юваётган 4-синф боласининг онаси билан суҳбат қурилганида бу каби ҳолатлар 4 йил давомида умуман кузатилмагани ва ушбу расмни кўриб тушунишмаганини билдирган.

«Албатта бу ҳолат ўрганилиб, унга ойдинлик киритилгач, бола ҳуқуқларини таъминлашда, уларнинг таълим олиши, соғлиғини сақлаш масалаларида йўл қўйилган камчиликлар аниқланса, уларга тегишли чоралар кўрилади», — дейилади хабарда.

Самарқанд вилоятидаги минтақавий вакил Н.Раббимованинг сўзларига кўра, муассасада носоғлом муҳит ҳукм сурмоқда. Ходимлар ўртасида ўзбошимчалик, раҳбарларга бўйсунмаслик, лавозим вазифаларини бажармаслик, ўз ишига эътиборсизлик билан қараш ҳолатлари кўзга ташланмоқда.

Мазкур масала Самарқанд вилояти ҳокими назоратига олиниб, муассасадаги мавжуд муаммоларни бартараф этиш бўйича қатъий вазифа ва топшириқлар берилгани маълум қилинган.