Samarqand viloyati Oqdaryo tumanidagi 63-sonli ixtisoslashgan maktab-internatdagi yuz-ko‘zlari ko‘kargan, yirtiq-yamoq kiyimlarda yurgan va kir yuvayotgan bolalar suratlari tarqalgandi. Vaziyat Senat qo‘mitasi tomonidan nazoratga olinib, holat yuzasidan Samarqand viloyati hokimligi tomonidan ishchi guruh tuzilgandi. Vaziyat bolalar huquqlari bo‘yicha vakil o‘rinbosari tomonidan nazoratga olingani hamda o‘rganib chiqilgani ma’lum qilindi.
Oliy Majlisning inson huquqlari bo‘yicha vakili (ombudsman) matbuot xizmatining qayd etishicha, Samarqand viloyati hokimiga holatni o‘rganish va to‘plangan ma’lumotlarni taqdim etish bo‘yicha so‘rov yuborilgan.
Holat 25-may kuni bola huquqlari bo‘yicha vakilning Samarqand viloyatidagi mintaqaviy vakili N.Rabbimova, Samarqand viloyati hokimi Erkinjon Turdimov, tuman hokimi Najmiddin Sulaymonov, tuman prokurori Dilshod Kubayev, tuman IIB boshlig‘i Bahodir Ibragimov, viloyat Xalq ta’limi boshqarmasi boshlig‘i Zebiniso Shodiyeva, boshqarmaning mas’ul xodimlari tomonidan o‘rganilgan.
Mintaqaviy vakilning aniqlashicha, Samarqand viloyati, Oqdaryo tumanidagi ushbu muassasada tarbiyalanayotgan suratdagi 2 nafar bola otasi tomonidan uyiga qaytarib olib ketilgan, ko‘zi ko‘kargan bola esa 11-mart kuni tengdoshi bilan urishgani va o‘shanda ko‘zi ko‘karganini aytgan. Bu holat bolaning tibbiy anketasida ham qayd etilgan.
Shuningdek, tog‘orada kir yuvayotgan 4-sinf bolasining onasi bilan suhbat qurilganida bu kabi holatlar 4 yil davomida umuman kuzatilmagani va ushbu rasmni ko‘rib tushunishmaganini bildirgan.
“Albatta bu holat o‘rganilib, unga oydinlik kiritilgach, bola huquqlarini ta’minlashda, ularning ta’lim olishi, sog‘lig‘ini saqlash masalalarida yo‘l qo‘yilgan kamchiliklar aniqlansa, ularga tegishli choralar ko‘riladi”, — deyiladi xabarda.
Samarqand viloyatidagi mintaqaviy vakil N.Rabbimovaning so‘zlariga ko‘ra, muassasada nosog‘lom muhit hukm surmoqda. Xodimlar o‘rtasida o‘zboshimchalik, rahbarlarga bo‘ysunmaslik, lavozim vazifalarini bajarmaslik, o‘z ishiga e’tiborsizlik bilan qarash holatlari ko‘zga tashlanmoqda.
Mazkur masala Samarqand viloyati hokimi nazoratiga olinib, muassasadagi mavjud muammolarni bartaraf etish bo‘yicha qat’iy vazifa va topshiriqlar berilgani ma’lum qilingan.
Izoh (0)