Yaponiyada o‘tkazilgan 24 soatli Super Taikyu poygalar seriyasida birinchi bor to‘liq vodorodda harakatlanuvchi avtomobil ishtirok etdi. Siqilgan vodorodda yuradigan Toyota Corolla Sport finish chizig‘ini bosib o‘tishga muvaffaq bo‘lgan, deb xabar beradi Motor.
Vodorodda harakatlanuvchi Toyota Corolla Sport transmissiya, to‘liq uzatmali tizim, shuningdek, 1,6 litrli uch silindrli GR Yaris dvigateliga ega bo‘lgan, biroq yapon muhandislari agregatni jiddiy modifikatsiya qilgan. Kiritilgan o‘zgartirishlar natijasida Corolla to‘liq vodorodda harakatlanib, marafon poygasida ishtirok etgan tarixdagi birinchi avtomobilga aylandi. Poygalarning bundan oldingi ishtirokchilari vodorod yonilg‘isidan elektr energiyasini ishlab chiqarish yo‘lida foydalangan.
24 soatli poyga davomida Corolla yonilg‘i quyish uchun 35 marotaba to‘xtashni amalga oshirgan. Ichki yonuv dvigateliga ega raqib mashinalar esa o‘rtacha 20 marotaba to‘xtashni amalga oshirgan. Vodorod dvigatellardan foydalanishning asosiy o‘ziga xosligi — gaz yonishining yuqori tezligida. Shu sababli muhandislar sportkarning orqa qismiga to‘rtta kompozit yonilg‘i bakini o‘rnatgan bo‘lib, unda 700 bar gazsimon vodorod saqlangan.
Vodorodli Corolla, naqadar murakkabligiga qaramay, marafon poygani yakunlashga muvaffaq bo‘lgan. Toyota vakillari ushbu texnologiyani takomillashtirish va kelajakdagi poygalarda ham vodorod avtomobillarda ishtirok etish niyatida ekanliklarini ma’lum qilgan. Muhandislarning fikricha, vodorod dvigatellar elektromotorlarga munosib raqobatchiga aylanadi.
Avvalroq Rim Papasi vodorodda harakatlanadigan Toyota sedanidan foydalanishga o‘tgani to‘g‘risida xabar berilgandi.
Izoh (0)