Франция президенти Эммануэль Макрон 1994 йилда Шарқий Африка давлати Руандада содир этилган геноцид учун Франция ҳам жавобгар эканини тан олди. Бу ҳақда у Руандага ташрифи чоғида маълум қилди, деб ёзади Deutsche Welle.
«Бугун бу ерда итоаткорлик ва эҳтиром билан ёнингизда турар эканман, мен ўз жавобгарлигимизни англадим», — деди Макрон Руанда пойтахти Кегалидаги туци халқининг 250 мингдан ортиқ вакили дафн этилган Геноцид ёдгорлигида турган ҳолда.
Унинг сўзларига кўра, Франция «Руанда халқига етказилган азоб-уқубатлар тўғрисида узоқ вақт сукут сақланган ҳақиқат»ни тан олишга мажбурдир. Шу билан бирга, у Франция геноцидда иштирок этмаганини таъкидлади.
Ўз навбатида Руанда президенти Пол Кагаме геноциддаги Франциянинг роли «унутилмаслиги, аммо кечирилиши» мумкинлигини айтди.
Илгари Руанда бир неча бор Францияни 1994 йилда юз берган қатлиомда иштирок этганликда айблаган эди. Қирғинда 800 мингга яқин одам, асосан, туци ва хути халқи ўлдирган.
Франция комиссиясининг ҳисоботида айтилишича, расмийлар геноцидни олдиндан кўра билмагани, чунки «мустамлакачилик кайфиятидан кўр бўлгани» учун зиммасига катта жавобгарликни олади.
Расмий равишда туци халқига қарши геноцид деб номланган Руандадаги қатлиом 1994 йил июль ойида бўлиб ўтган. Қирғин хуту ҳукуматининг буйруғи билан амалга оширилган, турли тахминларга кўра унда 1 миллионгача одам ўлдирилган — бу мамлакат аҳолисининг, тахминан, 20 фоизини ташкил қиларди.
Геноцид Руандадаги сиёсий элита томонидан режалаштирилган ҳамда армия, ички қўшинлар, шунингдек, ҳукумат томонидан қўллаб-қувватланган гуруҳлар томонидан амалга оширилган. 2006 йилда Франция ҳукумати Руандадаги геноцидда баъзи сиёсатчиларнинг иштирокини текширишга ва мамлакат президенти Пол Кагаме даврасида бўлган бир неча кишини ҳибсга олишга қарор қилган эди.
Изоҳ (0)