Тошкент метросида поезд яна тўхтаб қолди. «Тошкент метрополитени» УК ҳолатга расмий изоҳ берди.
Фото: «Дарё» / Мадина Нурман
Маълум қилинишича, 24 май куни соат 08:52 да 4-сонли йўналиш бўйлаб ҳаракатланаётган поезд техник сабабларга кўра «Ҳамид Олимжон» бекатида тўхтаб қолган. Воқеа ҳайдовчи томонидан поезд носозлиги аниқланиши муносабати билан содир бўлган.
Йўловчилар вагонлардан туширилган ва поезд захирага, «Пахтакор» бекатининг берк қисмига жўнатилган.
«16-сонли йўналиш бўйича орқадан келаётган поезд йўловчиларни олиб, жадвалга мувофиқ ҳаракатланишни давом эттирди. Келтирилган ноқулайликлар учун узр сўраймиз», — дейилади расмий изоҳда.
Сўнгги вақтларда Тошкент метрополитени билан боғлиқ шу каби воқеалар тез-тез юз бермоқда. Хусусан, 13 май куни «Амир Темур хиёбони» бекатида барча йўловчилар тушириб юборилганди. 7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди.
9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган.
18 март куни эса «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.
