Чехия Врбетица қишлоғида содир этилган портлашлар бўйича текширув жараёнида чалкашликда қолди ва бирор тайинли натижага эришиши ҳам даргумон. Бу ҳақда Россия ташқи ишлар вазири Сергей Лавровнинг сўзларига таяниб «Известия» хабар берди.

Фото: Global Look Press

«Кўриб турганингиздек, Чехия етти йил олдин содир бўлган портлашлар ҳақидаги воқеани шармандалик билан ҳал қилмоқда. Шу йиллар давомида тергов органлари нима билан шуғулланганини ҳали ҳеч ким тушунтириб беролмади, улар ўз кўрсатмаларида чалкашиб кетди, тобора янги версияларни илгари сурмоқда», — деди Лавров.

Унинг таъкидлашича, аввал терговни якунлаш, сўнгра баъзи хулосалар чиқариш, бундан ташқари, дипломатларни чиқариб юбориш тўғрисидаги қарорни тергов билан боғлиқ ҳолда қабул қилиш керак.

«Ҳали текширув тугамаган ишда дипломатларни айблаб, мамлакатдан чиқариб юборишдан олдин бундай масалаларни аввал ўзлари ҳал қилиши керак. Чехия олиб бораётган услубга кўра, текширувнинг аниқ бир натижа билан тугаши даргумон», — деди ТИВ раҳбари.

Шу куни Халқаро гуманитар ва сиёсий тадқиқотлар институти эксперти Владимир Брутер «Известия» газетасига Врбетицадаги портлашлар сабаби бўйича Чехия бош вазири Андрей Бабиш ва мамлакат адлия вазири Мария Бенешова ҳамда президент Милош Земан ўртасидаги тортишувлар тўғрисида фикр билдирди.

Земан воқеа юзасидан бир нечта версиялар текширилаётгани ҳақидаги баёнотидан фарқли ўлароқ, Бабиш полиция Россия махсус хизматлари билан боғлиқ бўлган ягона версия билан иш олиб бораётганини айтган.

Чехия президенти Врбетицадаги портлашлар сабабини камомадни яширишга уриниш деб атаган. Шунингдек, у воқеа сабабининг дастлабки версияси ўқ-дориларни сақлашда бепарволикка йўл қўйилиши эканини эслатиб ўтган.

Бош вазир ва адлия вазири воқеада фақат Россиядан гумон қилинаётганини таъкидлаган.

Аввалроқ Чехия Врбетицадаги портлашлар учун Россиядан 47 миллион доллар товон пули талаб қилмоқчилиги ҳақида хабар берилганди.

Шунингдек, Чехия бош вазири Андрей Бабиш Евроиттифоқ мамлакатлари раҳбариятини Врбетица қишлоғидаги портлашлар ҳақидаги иш бўйича Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирган эди.

Чехия Россияни 2014 йил 17 апрелда Моравиянинг жануби-ғарбий қисмидаги ўқ-дорилар омборида содир бўлган портлашларга алоқадорликда айблаганидан кейин улар ўртасидаги кенг кўламли сиёсий-дипломатик низо пайдо бўлди. Шундан сўнг Прага қиймати 6 миллиард евро бўлган «Дуковани» атом электр станциясининг янги энергия блокини қуриш бўйича тендерда иштирок этиш учун «Росатом» давлат корпорациясининг номзодлар сафидан чиқарилишини эълон қилди.

Бунинг ортидан Чехия 18 нафар россиялик дипломатни мамлакатдан чиқариб юборди. Бунга жавобан Москва ҳам 20 нафар чехиялик дипломатни мамлакатдан чиқариб юборди.