Исландияда ҳаракатга келган Фаградальсфьядль вулқони жойлашган ер майдони сотувга қўйилди, деб ёзмоқда Bloomberg агентлиги.
Фото: «News.pn»
«Бу ер майдони мос нарх эвазига сотиляпти, биз эса энг камида иккита таклифни олиб бўлдик», — деб хабар берди Анна Тордис Гудмундсдоттир. У вулқон жойлашган Храун фермасига эгалик қилувчи 19 нафар меросхўрдан бири ҳисобланади.
Гудмундсдоттирнинг сўзларига кўра, ер майдонига оиланинг бир неча авлодлари эгалик қилиб келган. Ҳозир эса у « бу ерда кимдир жамият учун фойдалироқ нимадир қуриши»ни хоҳлайди. Храун ер эгалари ассоциациясининг раиси, Гудмундсдоттирнинг амакиваччаси Сигурдур Гуджон Гисласоннинг маҳаллий Stod 2 телеканалига хабар беришича, хоҳловчилар ер майдонини тўлиқ ёки қисман сотиб олиши мумкин.
Исландия ҳукумати ер майдонини сотиб олишни режалаштирмаяпти, лекин вулқон ҳаракатга келган ҳудудни сайёҳлар учун диққатга сазовор жойга айлантириш учун пул ажратади, деб таъкидлади Исландия бош вазири Катрин Якобсдоттир RUV телеканалига берган интервьюсида. Унинг сўзларига кўра, агар ҳудуд жамоат учун очиқлигича қолса, ҳукумат ушбу иншоотда зарур инфратузилмани яратиш учун 70 миллион Исландия кронасини (564 минг доллар) йўналтиришга тайёр.
Фаградальсфьядль вулқони Исландиянинг энг машҳур сайёҳлик марказларидан бирига айланиши учун барча имкониятларга эга, деб ёзмоқда Bloomberg. Геологларнинг прогнозларига кўра, мамлакат пойтахти Рейкявикдан атиги бир соатлик масофада жойлашган вулқоннинг ҳаракати яна бир неча йил давом этиши мумкин.
Фаградальсфьядль вулқони 19 март куни кечқурун ҳаракатга келган эди. Бундан олдин яриморолда сейсмик фаоллик кузатилган: тўрт ҳафта ичида у ерда 50 мингдан ортиқ зилзила қайд этилган..
Associated Press нашрининг маълумотларига кўра, вулқон 6 минг йилдан буён ҳаракатга келмаган эди. Вулқон отилишини томоша қилиш учун минглаб одамлар тўпланди, уларнинг баъзилари ҳаттоки вулқон лавасида ҳот-дог учун сосискалар пиширди, деб ёзмоқда Bloomberg.
