Namangan shahrida Ramazon hayiti arafasida mukammal ta’mirlangan “O‘n bir Ahmad” ziyoratgohi foydalanishga topshirildi. Bu haqda “Daryo” muxbiri Azizbek Abduvaliyev xabar bermoqda.
Shaharning Davlatobod tumani, Yuqori G‘irvon mahallasida joylashgan mazkur qadamjo mahalliy aholi tomonidan eng ko‘p ziyorat qilinadigan maskanlardan biri hisoblanadi.
Ushbu ziyoratgoh haqida turli rivoyatlar bor. Asosan, islom olamining turli hududlari va turli yillarda yashab o‘tgan 11 nafar Ahmad nomi bilan ataluvchi aziz-avliyo va shayxlar sharafiga tiklangan deya talqin qilinadi.
Oxirgi yillarda ziyoratgohning holatiga ancha putur yetgan, bu yerga olib boruvchi yo‘l esa abgor holatga kelgandi.
Shu bois 2018-yilda Namangan shahar hokimligi tomonidan “O‘n bir Ahmad” ziyoratgohida mukammal ta’mirlash ishlari boshlangandi. Ammo pandemiya sabab bu tashabbus keyinchalik birmuncha to‘xtab qoldi. O‘tgan yili kuz oylariga kelib bunyodkorlik ishlari yana avj oldi.
“Qariyb 1 gektar maydonni egallagan ziyoratgohda maqbara, 110 metrli sharqon uslubdagi ayvon, uchta shiypon, tahoratxona, namozxona, jonliq so‘yish uchun alohida joy va oshxona barpo etildi. Ramziy darvoza, favvora, sharshara va hovuz qurildi. Ziyoratgohga olib keluvchi yo‘l ravon ko‘rinishga keltirilib, 150 ta mashina uchun mo‘ljallangan avtoturargoh foydalanishga topshirildi”, — deydi Namangan shahrida ziyoratgohlar, muqaddas qadamjolar va tarixiy obidalarni saqlash, obodonlashtirish va boshqarish direksiyasi direktori Hamidxon Qahharov.
Hamidxon Qahharovning aytishicha, hozirgi kunda viloyat hokimi Shavkat Abdurazzoqovning tashabbusi bilan Namangan shahridagi “Mavlono” ziyoratgohida ham mukammal ta’mirlash ishlari boshlanish arafasida.
Izoh (0)