Россиянинг Қозон шаҳридаги мактабда отишма оқибатида 8 киши ҳалок бўлди. Татаристонда 12 май мотам куни деб эълон қилинди (фото ва видео)

Россиянинг Қозон шаҳридаги (Россия таркибига кирувчи Татаристон Республикаси пойтахти) 175-сонли мактабда 11 май куни эрталаб отишма содир бўлди, деб ёзади Meduza.

Дастлабки маълумотларга кўра, қуролланган икки киши мактабга бостириб кириб, ўқувчиларга қарата ўқ узган. Кейинроқ ҳужум қилганлардан бири мактаб кираверишида ҳибсга олинган.

База агентлиги унинг исми Ильназ Галявиев экани ҳақида ёзди. Агентлик маълумотларига кўра, 19 ёшли гумонланувчи тўрт йил олдин мактабни тугатган, ҳозирда коллежда ўқийди. Бир неча кун олдин у Telegram-канал очиб, у ерда ўзини «Худо» деб атаган. Ҳодисадан аввалроқ каналда у «катта миқдордаги биологик чиқиндиларни ўлдириши» ва шундан сўнг ўз жонига қасд қилиши ҳақида ёзган.

Ҳужум қилган иккинчи шахс таълим муассасасининг тўртинчи қаватида қуршовга олинган. У бир неча кишини гаровга олган бўлиши мумкин, деб ёзади «Интерфакс».

«РИА Новости» фавқулодда хизматларга асосланиб ёзишича, мактабдаги отишмадан кейин портлаш содир бўлган. Mash хабарига кўра, иккинчи ҳужумчи махсус операция пайтида ўлдирилган. Буни «Интерфакс» ва «ТАСС» манбалари ҳам тасдиқламоқда. Татаристон раҳбари Рустам Минниханов, ўз навбатида, жиноятчи ёлғиз ҳаракат қилгани ва «бошқа шериклар аниқланмаганини» айтди. Иккинчи ҳужумчи ҳақидаги маълумот полиция томонидан ҳам рад этилди.

«РБК»  хабар беришича, 41 ёшли Рамиль Мухамедшин жиноятчига ёрдам берганликда гумон қилиниб ҳибсга олинган. Татаристон раҳбарининг матбуот хизмати саккиз киши — етти нафар бола ва бир ўқитувчи ҳалок бўлгани, 16 киши жароҳат олгани ҳақида хабар берди. «РИА Новости» маълумотларига кўра, отишмада камида 11 киши ҳалок бўлди. Шунингдек, 32 нафар жабрланувчи ҳақида ҳам хабар берилди, улардан 16 нафари касалхонада. Мактаб биноси қуршаб олинган. Ўқувчилар яқин атрофдаги болалар боғчасига эвакуация қилинган. Кўплаб мактаб ўқувчилари бино деразаларидан сакраган. Уларнинг икки нафари ҳалок бўлган.

Ички ишлар вазирлиги отишма тугаганидан кейин аксилтеррор операцияси режими жорий қилингани ҳақида эълон қилди. 11 май куни Қозон шаҳридаги барча мактабларда иккинчи сменадаги дарслар бекор қилинди.

Business Online газетасининг ёзишича, полиция шунингдек, Туганлик кўчасидаги 10-рақамли уйга жўнаб кетган. Таъкидланишича, ҳибсга олинган ўсмир ўзининг яшаш жойига бомба қўйганини айтган. Ҳуқуқни муҳофаза қилиш идоралари зудлик билан квартирани зарарсизлантириш ҳаракатида.

Ҳуқуқ-тартибот идоралари ходимлари бошқа таълим муассасаларида отишма бўлгани ҳақидаги маълумотларни рад этди, бу ҳақда сохта хабар тарқатган икки киши ҳибсга олинди.

Отишмада ҳалок бўлганлар хотирасига бағишлаб Татаристонда 12 май мотам куни деб эълон қилинди.