Шавкат Мирзиёев 10 май куни «Рамазон ҳайитини нишонлаш тўғрисида»ги ПҚ-5110-сонли қарорга имзо чекди.

Қарорга кўра, Ўзбекистон мусулмонлари идорасининг 2021 йилда Рамазон ҳайитининг биринчи куни 13 май — пайшанба кунига тўғри келиши ҳақида қабул қилган қарори инобатга олиниб, мамлакатда 2021 йил 13 май Рамазон ҳайити байрами сифатида нишонланиши белгиланди.

Шунингдек, Президентнинг 10 майдаги ПФ-6222-сонли фармони асосида 2021 йил 14 май (жума) ҳамда 15 май (шанба) кунлари қўшимча дам олиш куни деб эълон қилинди.

Бундан келиб чиқиб, ўзбекистонликлар Рамазон ҳайити муносабати билан кетма-кет 4 кун дам оладиган бўлди:

  • 13 май, пайшанба — Рамазон ҳайитининг биринчи куни (ишланмайдиган байрам куни);
  • 14 май, жума — қўшимча дам олиш куни (барча учун);
  • 15 май, шанба — қўшимча дам олиш куни (барча учун);
  • 16 май, якшанба — умумий дам олиш куни.

Шунингдек, Қурбон ҳайити муносабати билан 20–22 июль дам олиш кунлари сифатида белгиланди (17 июль ва 24 июль учун дам олиш кунлари кўчирилади).

Бундан ташқари, қарор билан 31 декабрь ҳам қўшимча дам олиш куни этиб белгиланди.