Чехия бош вазири Андрей Бабиш Евроиттифоқ мамлакатлари раҳбариятини Врбетице қишлоғидаги портлашлар ҳақидаги иш бўйича Чехия ҳукумати билан бирдамлик рамзи сифатида ҳеч бўлмаганда бир нафардан Россия дипломатларини чиқариб юборишга чақирди. Бу ҳақда Бабиш Португалиядаги Евроиттифоқ мамлакатлари президентлари ва бош вазирлари норасмий саммитида журналистларга маълум қилди.
Андрей Бабиш.
Фото: AP Photo
«Биз шуни доим тушунишимиз керакки, Евроиттифоқнинг битта давлатига ҳужум қилиш — унинг барча давлатларига ҳужум қилиш демакдир. Мен улардан ҳеч бўлмаганда бир нафардан Россия дипломатини мамлакатларидан чиқариб юбориш имкониятини кўриб чиқишни сўрадим», — деди у.
Бабиш ушбу мавзуни 7 май куни кечқурун Евроиттифоқ мамлакатлари етакчилари билан учрашувда кўтарди. Чехия бош вазири сўзларига кўра, ушбу масала бўйича, хусусан, Германия канцлери Ангела Меркель ва Франция президенти Эммануэль Макрон ўз фикрини билдирган.
Чехия Россияни 2014 йил 17 апрелда Моравиянинг жануби-ғарбий қисмидаги ўқ-дорилар омборида содир бўлган портлашларга алоқадорликда айблаганидан кейин улар ўртасидаги кенг кўламли сиёсий-дипломатик низо пайдо бўлди. Шундан сўнг Прага қиймати 6 миллиард евро бўлган «Дуковани» атом электр станциясининг янги энергия блокини қуриш бўйича тендерда иштирок этиш учун «Росатом» давлат корпорациясининг номзодлар сафидан чиқарилишини эълон қилди.
Бунинг ортидан Чехия 18 нафар россиялик дипломатни мамлакатдан чиқариб юборди. Бунга жавобан Москва ҳам 20 нафар чехиялик дипломатни мамакатдан чиқариб юборди. 22 апрель куни Чехия ташқи ишлар вазири Прагада россиялик дипломатлар сонининг чекланиши ҳақида маълум қилди: уларнинг сони Москвадаги Чехия дипломатик ваколатхонасининг ходимлари сони (7 киши) билан тенглаштирилади. Элчихона ходимларининг мамлакатни май ойининг охиригача тарк этиши белгиланган.
Чехиянинг хатти-ҳаракатларини Словакия ва Болтиқбўйи мамлакатлари ҳукуматлари қўллаб-қувватлади. 23 апрель куни Болтиқбўйи мамлакатлари россиялик дипломатларни чиқариб юбориши ҳақида маълум қилди: Литва Россия элчихонасининг икки нафар ходимини, Латвия ва Эстония бир нафардан ходимини ўз ҳудудидан чиқариб юборишга қарор қилди.
Бунгача Словакия уч нафар россиялик дипломатни ўз ҳудудидан чиқариб юборишга қарор қилган эди. Ўшанда мамлакат бош вазири Эдуард Хегернинг таъкидлашича, Словакия махсус хизматлари маълумотлари ўрганиб чиқилгандан сўнг «ҳозирги пайтдаги геосиёсий аҳвол, шунингдек, Чехиядаги вазият сабабли» шундай қарор қабул қилинган.
