Мексиканинг Мехико шаҳридаги метро ҳалокати қурбонлари хотирасига уч кунлик мотам эълон қилинди. Президент Андрес Мануэль тегишли фармонни имзолади, деб ёзади «Коммерсантъ».
Фото: Getty Images
«Мехико метроси жамоавий транспорт тизимининг 12-линиясида 2021 йил 3 майда содир бўлган фожиа муносабати билан уч кунлик миллий мотам эълон қилинди», — дейилади ҳужжатда. Фармон 7 май кунигача амал қилади. Ушбу муддатда давлат байроқлари ярим тушурилган ҳолда бўлади.
Эслатиб ўтамиз, маҳаллий вақт билан 3 май куни 22:30 да (Тошкент вақти билан 4 май 08:30) Мексика пойтахтида 12-метро линияси кўприги поезд ўтиб кетаётган пайтда қулаб тушган. Ҳодисага метро кўприги устунларидан бирига автомобиль келиб урилиши сабаб бўлган.
Шаҳар мери Клаудия Шейнбаумнинг баёнотига асосланиб, El Universal нашри ҳодисада ҳалок бўлганлар сони 27 кишига етгани ҳақида хабар берди. Ундан аввал шаҳар мери қурбонлар сони 23 кишига етгани, улар орасида вояга етмаганлар ҳам борлиги тоғрисида баёнот берган эди.
«Ҳодиса айбдорлари ҳақида гапиришга ҳали эрта ... Тергов натижалари аниқ бўлмагунча, биз маълумотларга таяниб, тахмин қила олмаймиз», — деди шаҳар ҳокими. Шейнбаумнинг сўзларига кўра, айни пайтда метрополитен йўловчилари учун муқобил ҳаракат транспорти ташкил қилинган. El Universal нашрининг хабар беришича, Фавқулодда вазиятлар вазирлигининг сўнгги маълумотларига кўра, ЙТҲда 80 киши жароҳат олган.
Қайд этилишича, 2017 йилги зилзиладан кейин айни пайтда қулаб тушган эстакаданинг устунларида ёриқлар пайдо бўлган, маҳаллий аҳоли ўша вақтдаёқ унинг қулаб тушишидан хавфсираган эди.
