Жонс Ҳопкинс университети маълумотларига кўра, дунёда коронавирусга чалинганлар сони 153 577 850 кишига етди. Бу борада доимгидек, АҚШ (32,4 миллион), Ҳиндистон (20,2 миллион), Бразилия (14,7 миллион), Франция (5,7 миллион) ва Туркия (4,9 миллион) етакчилик қилмоқда. COVID-19 оқибатидаги ўлимлар эса 3 214 522 тани ташкил қилмоқда.

Фото: “Дарё” / Мадина Нурман

Туркия ҳукумати коронавирус билан боғлиқ вазият туфайли, амалдаги локдаун шартларини кучайтиришга қарор қилди. Янги чоралар 7 май куни кучга киради.

«7 майдан дўконларда, шу жумладан, супермаркетларда, фақат асосий озиқ-овқат маҳсулотлари, гигиена воситалари, ҳайвонлар учун озуқалар ва косметика воситалари (парфюмерия ва пардоз воситаларидан ташқари) сотилиши мумкин», — дейилади мамлакат Ички ишлар вазирлиги хабарида.

Энди спиртли ичимликларни сотишга қўйилган тақиққа электроника воситалари, ўйинчоқлар, канцелярия, кийим-кечак, автомобиль учун аксессуарлар, идиш-товоқ ва боғдорчилик асбоблари ҳам қўшилди.

Мавзуга доир: Туркияда коронавирус туфайли 17 майгача тўлиқ локдаун жорий этилади

Филиппин президенти Родриго Дутерте 3 май, душанба куни COVID-19’га қарши вакцинанинг биринчи дозасини олди.

76 ёшли давлат раҳбари Хитойнинг Sinopharm компанияси вакцинаси билан эмланган. «Мен эмланишни кўпдан бери кутаётган эдим», — деди Дутерте.

Мавзуга доир: Фото: Интернет излаб тоғга чиқаётган ўқувчилар. Локдаунда филиппинликлар қандай таълим олмоқда?

2022 йилда дунё аҳолисининг вояга етган қисмини коронавирусга қарши эмлаш учун Жаҳон соғлиқни сақлаш ташкилотига 35 миллиард доллардан 45 миллиард долларгача пул керак бўлади, деди ЖССТ раҳбари Тедрос Гебрейесус.

Унинг айтишича, ушбу сумма ЖССТ томонидан пандемияга қарши кураш учун ишга туширилган АCТ Accelerator халқаро дастурини молиялаштириш учун зарур бўлган 19 миллиард долларга қўшимча равишда керак бўлади.

Мавзуга доир: COVID-19 пандемияси бир неча ой ичида назорат остига олинади — ЖССТ

Испания аҳолисининг деярли 5 миллион коронавирусга қарши тўлиқ эмланди. Мамлакат ҳукумати 4 май куни эрталабга қадар 5 миллионлик маррадан ўтишни кўзлаган эди.

Июннинг биринчи ҳафтасигача яна 5 миллион кишини, ёз охиригача эса 33 миллион одамни ёки вояга етган аҳолининг 70 фоизини эмлаш мақсад қилинган.

Мавзуга доир: Коронавирус пандемияси тезлашди, Испания сайёҳлар учун очилади, COVID-19’га нисбатан иммунитет қанча вақт сақланади? Коронахабарлар