Колумбияда солиқ ислоҳотларига қарши норозилик намойишларида 19 киши ҳалок бўлди, 846 киши жароҳат олди. Бу ҳақда El Pais нашри мамлакат миллий мудофаа вазири Диего Моланонинг баёнотига асосланиб хабар берди. Шунингдек, мамлакат бўйлаб 431 киши ҳибсга олинган.
Намойишлар олти кундан буён Колумбиянинг энг йирик шаҳарлари — Богота, Меделин, Кали ва Перейрада бўлиб ўтмоқда.
https://twitter.com/GoGlobalAdvisor/status/1388938478554124292
Мудофаа вазири намойишчиларга қарши куч ишлатилишини асосли деб атади. «Булар қасддан ҳаракатланаётган бузғунчилар. Улар FARC ва ELN’нинг мухолифат гуруҳлари томонидан ташкил қилинган ва улар томонидан молиялаштирилиб, мамлакатдаги вазиятни беқарорлаштиришга интилмоқда», — деди мудофаа вазири. Гап Колумбия Инқилобий қуролли кучлари ва Миллий озодлик армиясининг марказий ҳокимият органларига қарши қуролли кураш олиб бораётган радикал чап қанот ташкилотлари ҳақида кетмоқда.
Вазирнинг сўзларига кўра, намойишчилар ўз ҳаракатларини WhatsApp ва Telegram мессенжерлари орқали ташкил қилмоқда.
Молано митинг иштирокчиларини «террорчилар» деб атади. Унинг айтишича, намойишчиларнинг хатти-ҳаракатлари натижасида бир нафар полиция капитани ўлдирилган, 540 нафар ҳуқуқ-тартибот идоралари ходими ва 306 нафар фуқаро жароҳат олган. Шунингдек намойишчилар 94 банкка, 254 дўконга, 14 пуллик йўлларга, тўртта ҳайкалга, 69 транспорт станциясига, 36 банкоматга зарар етказган.
BBC Колумбиядаги омбудсман идорасига асосланиб хабар беришича, намойишлар пайтида 16 нафар тинч аҳоли ва бир полициячи ҳалок бўлган. Шу билан бирга, таълим ходимлари касаба уюшмаси нашрга ҳуқуқни муҳофаза қилиш органлари ходимлари томонидан 1089 та зўравонлик ҳолатлари, шу жумладан, 726 та ўзбошимчалик билан ҳибсга олиш, 27 та қотиллик ва олтита жинсий зўравонлик ҳолатлари тўғрисида хабар берди.
Президент Иван Дуке билан «самимий учрашувдан сўнг» норозилик намойишлари ўртасида, Колумбия молия ва давлат кредит вазири Альберто Карраскилла истеъфога чиқди, дея хабар берди вазирлик Twitter’да. Хабарга кўра, Дуке Карраскилланинг ўрнига илгари савдо, саноат ва туризм вазири бўлиб ишлаган Хосе Мануэль Рестрепо тайинланганини эълон қилди.
Аввалроқ Колумбия президенти Иван Дуке солиқ ислоҳотига қарши норозилик намойишлари бўлиб ўтаётган шаҳарларга ёрдам учун армия юборишини эълон қилган эди. Солиқ ислоҳоти лойиҳаси бюджетни қўшимча 6,8 миллиард долларга (тахминан ялпи ички маҳсулотнинг 2 фоизи) тўлдиришни кўзда тутади. ҚҚС (қўшилган қиймат солиғи) қўллашни кенгайтириш, қўшимча йиғимларни жорий қилиш, аҳолининг 2,4 миллион песо (660 доллар)дан юқори бўлган барча даромадларини солиққа тортиш таклиф қилинмоқда. Бу оммавий норозилик намойишларига олиб келди.
Изоҳ (0)