Қирғизистон прокуратураси Тожикистон билан низони «бостириб кириш» деб атади, Тожикистон прокуратураси эса Қирғизистоннинг ҳаракатларини «тажовузкорлик» деб баҳолади

Қирғизистон—Тожикистон чегарасидаги низо — Тожикистон томонидан ҳарбий ҳужумдир. Бу ҳақда Қирғизистон Бош прокуратураси маълум қилди, деб ёзади «РБК».

«Қўшиннинг доимий жойлашув жойидан узоқда ҳужумкор оғир қурол-яроғни қўллаш шундан гувоҳлик берадики, ушбу ҳарбий бостириб кириш Қирғизистоннинг суверен ҳудудини эгаллаб олиш мақсадида олдиндан режалаштирилган ва ташкиллаштирилган», — дея маълум қилишди идорада.

Таъкидланишича, Тожикистон томонидан жанговар ҳаракатларда «мунтазам қўшинлар, қуролланган ёлланма жангчилар ва бошқа ноқонуний қуролли гуруҳлар» қатнашган.

Бундан ташқари, муассаса Тожикистон ҳукуматини турар жойларни ва инфратузилманинг бошқа объектларини оммавий ёқиб юборишда айблаб, фуқароларга ва давлатга «жуда катта моддий зарар» етказилганини қайд этди.

Тожикистон Бош прокуратураси эса тожик-қирғиз чегарасидаги қирғизистонлик ҳарбийларнинг хатти-ҳаракатларини халқаро меъёрларга мувофиқ тажовузкорлик акти деб баҳолади.

«Давлат томонидан бошқа давлатнинг суверенитети, ҳудудий дахлсизлиги ёки сиёсий мустақиллигига қарши қуролли кучни қўллаш БМТ низоми ёки бошқа халқаро шартномаларга мувофиқ келмайди ва тажовузкорлик акти сифатида баҳоланади. Давлат томонидан бошқа давлатга қарши жиддий хусусиятга эга бўлган қуролли кучдан фойдаланиш ҳаракатларини амалга оширувчи қуролланган гуруҳларнинг юборилиши ҳам тажовузкорлик ҳаракати ҳисонланади», — дейилади Бош прокуратура хабарида.

Аввалроқ Қирғизистон ва Тожикистон Бош прокуратуралари чегарадаги қуролли низодан кейин бир-бирларининг ҳарбийларига ва фуқароларига нисбатан жиноий иш очган эди.

Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан. Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган.

Аввалроқ Қирғизистон ва Тожикистон ўз қўшинларини давлат чегарасидан олиб чиқиб кетишни якунлагани, шунингдек, низо чоғида гаровга олинган ўн нафар Қирғизистон фуқароси Тожикистонда асирликдан озод этилгани хабар берилган эди.