Украина Маданият ва ахборот сиёсати вазирлиги россиялик рэпер Моргенштернни (ҳақиқий исми — Алишер Валиев) миллий хавфсизликка таҳдид туғдирувчи шахслар рўйхатига киритди, деб хабар беради идора матбуот хизмати.
Россиялик мусиқачи «қора рўйхат»га Украина Хавфсизлик хизматининг талаби билан киритилган. Бунинг сабаби очиқланмаган. Эндиликда Моргенштерннинг мамлакатга киришига тақиқ ўрнатилган.
Рэпернинг ўзи эса Украина Маданият вазирлигининг қарорига Instagram’даги саҳифаси орқали муносабат билдирган: «Украина, концертлар бўлмайди. Кимдир мени сизларнинг миллатингизга хавф деб ҳисобламоқда».
«Громадскоэ» нашрининг ёзишича, Моргенштерн ёзда Киев, Харков ва Запорожеда концерт беришни режалаштирган, бироқ ўтган ҳафта мамлакатга киришга қўрқаётгани сабаб режалари ўзгарганини маълум қилган.
Рэпер 2019 йилнинг декабрида Одессада концерт берган эди, ўшанда шаҳардаги маҳаллий коллежда содир бўлган ёнғин қурбонлари хотирасига мотам эълон қилинган бўлган. Моргенштерн мотам маросимини «кўзбўямачилик» деб атаган. Шундан сўнг Украина президентининг сайтида мусиқачининг мамлакатга киришини тақиқлайдиган петиция пайдо бўлганди.
Украина миллий хавфсизлигига таҳдид уйғотувчи маданият ходимлари рўйхати 2015 йилдан буён юритилмоқда. Улар орасидан Иван Охлобистин, Сергей Безруков, Михаил Пореченков, Михаил Боярский, Григорий Лепс ва Иосиф Пригожин каби россиялик артистлар ўрин олган.
Эслатиб ўтамиз, Моргенштерн 2020 йилнинг октябрида Instagram’да Mercedes-Benz Э200 машинаси учун танлов ўтказган ва унда Бухорода яшовчи @aza_1002 аккаунти эгаси Азим Абдуллаев ғалаба қозонган эди.Моргенштерн ўшанда ғолиб билан боғланган ва автомобилни шахсан ўзи Ўзбекистонга олиб келишини маълум қилган. Кейинроқ мусиқачи Ўзбекистонда хорижда ишлаб чиқарилган машина учун белгиланган божхона тўловлари миқдоридан хабар топгач, ўз stories’ида видеохабар қолдирган. Рэпер декабрь ўрталарида Азим Абдуллаевга Mercedes автомобилини тантанали тарзда топшириш учун Бухорога келганди.
Изоҳ (0)