Шавкат Мирзиёев раислигида маҳаллий саноатни ривожлантиришга бағишланган видеоселектор йиғилиши бўлиб ўтди, дея хабар бермоқда «Gazeta.uz».
Йиғилишда давлат раҳбарининг таъкидлашича, сўнгги 3 йилда қурилиш материалларини ишлаб чиқариш ҳажми 1,5 бараварга ошган, лекин бу ҳали ички эҳтиёжни тўлиқ қоплаётгани йўқ.
Цементга бўлган эҳтиёж — 86 фоиз, қурилиш ойнаси — 69 фоиз, керамик буюмлар — 40 фоиз, гулқоғоз — 30 фоиз, лак-бўёқ 65 фоизга таъминланмоқда.
Умуман, 2020 йили қарийб 1 миллиард долларлик (металл ва ёғочдан ташқари) қурилиш материаллари импорт қилинган.
«Бугунги кунгача бирорта туман, шаҳар ёки вилоят раҳбари маҳаллий саноат салоҳияти ва ундан фойдаланишни чуқур ва пухта ўйлаб кўргани йўқ. Ҳудудга нима четдан олиб келиняпти? Нимани ўзида ишлаб чиқариш мумкин? Бунинг учун нима қилиш керак, деган саволлар ҳокимларни ҳар куни қийнаши керак», — деди Президент.
Маҳаллий саноатни ҳақиқатда ривожлантириш учун ҳар бир ҳудудда ишлаб чиқаришни камида 3—4 бараварга ошириш зарур. Давлат раҳбари маҳаллий саноатни ривожлантириш бўйича мутлақо янги «вертикал» тизим жорий этилишини маълум қилди.
«Бу масалага вилоят ҳокимларининг шахсан ўзи масъул бўлади ва ишларни ички талабни ўрганиш — импортни таҳлил қилиш — ресурс базасини аниқлаш — янги лойиҳаларни амалга ошириш занжири орқали йўлга қўяди», — деди Шавкат Мирзиёев.
«Саноатқурилишбанк» раиси Аннақличев қурилиш материаллари саноатини ривожлантириш, илғор технологияларни жорий этиш ва лойиҳаларни молиялаштириш ишларига масъул ва жавобгар этиб белгиланди.
2021 йил 1 июлга қадар хорижий экспертларни жалб этган ҳолда, банкнинг инвестиция компанияси ва барча филиалларида консалтинг марказлари ташкил қилинади.
Маҳаллий саноатни ривожлантириш вазифалари Сардор Умрзоқов ва унинг тизимига юклатилди. Маҳаллийлаштириш бўйича ҳоким ёрдамчилари ҳам ушбу тизим билан бирлаштирилиб, уларнинг вазифалари ва масъулияти қайта кўриб чиқилади. Сардор Умрзоқов икки ой муддатда маҳаллий саноатнинг ҳар бир йўналиши бўйича туманлар кесимида алоҳида дастурлар ишлаб чиқиши кераклиги айтилди.
«Ҳар бир вилоят, туман ҳокимининг мавжуд захираларни ишга солиш бўйича аниқ режалари бўлиши керак. Ғозғондаги қурилиш материаллари кластери тажрибаси барча ҳудудда жорий этилса, албатта, маҳаллий саноат кескин ривожланади», — деди Президент.
Мисол учун, бугунги кунда республикадаги мавжуд пардозбоп тошлар захирасининг 30 фоизидан ҳам фойдаланилмаяпти.
Бу кўрсаткич Бухорода — 11 фоиз, Қашқадарёда — 13 фоиз, Тошкент вилоятида — 15 фоиз.
Жумладан, Бойсун туманида 7 турдаги фойдали қазилмаларни (оҳактош, базальт, доломит, кварс қуми, пардозбоп тошлар) қайта ишлашни йўлга қўйиш мумкин. Ёки Пешку туманида 24 миллион куб метр табиий қоплама тошлар, 1,3 миллион тонна графит, 450 минг тонна минерал бўёқлар учун хом ашё захираларини ишга солиш режалаштирилган.
Бундан аввал Шавкат Мирзиёев Марказий банк раиси Мамаризо Нурмуродов тизимига ишонмаслигини, Шавкат Мирзиёев ЕХҲТ Демократик институтлар ва инсон ҳуқуқлари бўйича бюроси директорини қабул қилгани ҳамда Шавкат Мирзиёев Садир Жапаров билан Қирғизистон—Тожикистон чегарасидаги вазиятни тез фурсатда ҳал этишни муҳокама қилгани ҳақида хабар берилганди.
Изоҳ (0)