Ижтимоий тармоқда «Ишдан қуритвораман... формангни еч, едираман...» сарлавҳаси остидаги видеолавҳа тарқалди. Воқеа юзасидан ЙҲХББ маълумот берди.

Маълум қилинишича, ҳолат 2020 йилда Сирдарё вилоятида содир бўлган.

Қайд этилишича, 2020 йил 17 сентябрь куни соат 09:30 ларда Оқолтин тумани ИИБ ЙҲХБ ходимлари А.Маҳмудов ва А.Маматов туман ҳудудидан ўтувчи 4Р-35 автомобиль йўлининг 95-километрида хизмат олиб бораётган вақтда А.Маҳмудов томонидан Damas русумли автомобиль ҳайдовчисига тўхташ ишораси берилган. Ҳайдовчи ишорага бўйсунмасдан ҳаракатда давом этган.

ЙҲХБ ходимлари ҳайдовчини Nexia-2 русумли автомобилда кузатиб борган. Ҳайдовчи тўхтаган вақтда унинг ёнига бориб, бўйсунмай ҳаракатланиш сабаби ва меъёрий ҳужжатларини тақдим қилиши сўралганда, ўзаро тортишув ва низоли вазият юзага кела бошлаган.

Шундан сўнг ҳайдовчига нисбатан Маъмурий жавобгарлик тўғрисидаги кодекснинг 194-моддаси (ички ишлар органлари ходимининг қонуний талабларини бажармаслик) тартибида баённома тузилиб, ушбу кодекснинг 291-моддаси (транспорт воситаларини ушлаб туриш ва кўрикдан ўтказиш асослари ва тартиби) тартибида автомобиль жарима майдонига жойлаштирилган.

Тўпланган ҳужжатлар 2020 йил 22 сентябрь куни Гулистон шаҳар маъмурий суди томонидан ўрганилиб, ҳайдовчи А.Т.га нисбатан БҲМнинг бир баравари миқдорида жарима жазоси белгиланган.

Бундан аввал Чинозда инспекторнинг хонасига рухсатсиз кириб, у ердан Facebook’ка тўғридан-тўғри эфирга чиққан фуқаро 10 суткага қамалгани, Тошкент вилоятида ЙПХ инспекторига қаршилик кўрсатган Malibu ҳайдовчиси 5 суткага, Damas ҳайдовчиси эса 10 суткага қамалгани ҳамда Жиззахда қоидани бузган ҳайдовчини сўккан ЙПХ ходимига нисбатан хизмат текшируви тайинлангани ҳақида хабар берилганди.