Миржалол Қосимов «Шабоб ал-Аҳли»га қарши ўйиндаги камбэк ҳақида: «Шогирдларимга сўнгги дақиқаларни ҳимояда ўтказмасликни айтдим»

ОКМК клуби бош мураббийи Миржалол Қосимов Осиё Чемпионлар Лигаси 3-тури доирасида «Шабоб ал-Аҳли»га қарши ўйиндаги (2:1) ғалабадан кейин ўз фикрлари билан ўртоқлашди.

Икки жамоага ҳам ғалаба муҳим эди. Ютуқ иштиёқида майдонга тушгандик. Ўтган учрашувдаги мағлубиятга қарамасдан футболчилар ўйинга тўғри ёндашишди ва яхши тайёрланиб, ОЧЛ гуруҳ босқичидаги илк ғалабани тантана қилдик. Бу ҳам кичик тарих. Ғалаба серияси очилганидан хурсандмиз.

Рақиб «Шабоб ал-Аҳли» яхши, курашувчан ва шиддатли футбол намойиш этадиган жамоа. Ўйлашимча, ўйин яхши даражада ўтди. Иккинчи таймда жамоамиз ўйинни кучайтирди ва бу жиҳат беллашув якунига бориб ўз самарасини берди. Хурсандмиз. Лекин бу ғалабани эсдан чиқариб, кейинги баҳсга тайёргарлик кўриш керак. Ҳали ҳаммаси олдинда.

Камбэк? Мен нафақат ўйин сўнггида, балки, учрашув аввалидан олдинга интилиш ва ғалаба учун курашишни кўрсатма бергандим. Ўйин сўнгига яқин ҳимояга ўтирмасдан ҳужумга кўпроқ интилиш кераклигини таъкидлагандим. Футболда 5 дақиқа ичида кўп нарса рўй бериши ва воқеалар ривожи бутунлай ўзгариб кетиши ҳам мумкин. Масалан, 1999 йилги ЕЧЛ финалини эслайлик. Ўшанда «Манчестер Юнайтед» «Бавария» дарвозасига қўшиб берилган 3 дақиқа ичида иккита гол уриб, ғалабани илиб кетганди. Футболда бундай ҳолатлар бўлиб туради. Шу боисдан ҳам қўшиб берилган дақиқаларни ҳимояда ўтказмасдан олдинга ўтишни таъкидладим. Камбэкларнинг сири йўқ. Кўп нарса хоҳиш ва иштиёққа боғлиқ. Футболни мажбуран ўйнаб бўлмайди.

Миржалол Қосимов, ОКМК бош мураббийи

ОКМК ушбу ғалабадан кейин очколарини 4 тага етказиб олган ҳолда 3-ўринда бормоқда. Олмалиқликлар кейинги ўйинни ҳам «Шабоб ал-Аҳли»га қарши ўтказади.