Исроил Соғлиқни сақлаш вазирлиги мамлакатда коронавирус билан касалланиш даражасининг пасайиши муносабати билан аҳолига кўчада ҳимоя ниқобларини тақиш мажбуриятини бекор қилди. Бу ҳақда вазирлик веб-сайтига таяниб, «РБК» хабар берди.
«Бутун мамлакат бўйлаб касалланиш даражаси пастлигича қолмоқда, шунинг учун аҳолига очиқ ҳавода ниқоб тақиш талаби бекор қилинди», — дейилади хабарда.
Шу билан бирга, мамлакат Соғлиқни сақлаш вазирлиги одам гавжум бўлган шароитда ниқоб тақишни тавсия қилади. Бино ичида эса ниқоб тақиш мажбурий бўлиб қолмоқда.
Аввалроқ мамлакат расмийлари коронавирусга қарши эмланган хорижий сайёҳларни Исроилга киритиш шартларини маълум қилган эди. Сайёҳлар самолётга чиқишдан олдин коронавирус учун ПЗР-тестидан ўтиши керак. Бундан ташқари, сайёҳлар Исроил аэропортидан чиқиб кетиш учун иккинчи марта ПЗР-текширувидан ўтиши керак, шунингдек, мамлакатга келганлар эмлангани ёки илгари вирусдан даволанганини тасдиқлаш учун антитаналар бўйича текширувидан ўтиши лозим.
Исроил коронавирусга қарши эмланганлар учун 23 май куни ўз чегараларини очишини маълум қилди.
Мавзуга доир: Чеченистонда ҳам ниқоб тақмай юришга рухсат берилди ва республика ҳудудига кириш очиб қўйилди
Аввалроқ коронавирусга чалинган беморлар келиб тушмаётгани учун, Исроил касалхоналарида COVID-бўлимлар ёпилаётгани ҳақида хабар берилганди. 30 март куни Рамбам касалхонаси бирорта ҳам коронавирусга чалинган беморни қабул қилмаган, бир ой аввал эса бу ерга ҳар куни 15 нафардан бемор ётқизилар эди. Ассута ва Меир касалхоналарида ҳам шунга ўхшаш вазият кузатилган. Бошқа баъзи шифохоналарга коронавирусда гумон қилинган бир нафардан бемор келиб тушган.
Исроилда энг кўп COVID-беморлар ётган, бир пайтлар бир йўла 140 нафар бемор даволанган Ҳадасса касалхонаси — Эйн-Керем 30 март куни бор-йўғи уч нафар янги беморни қабул қилган. Таъкидланишича, ушбу вазият Исроилда аҳолининг оммавий эмланиши билан боғланмоқда.
Исроил аҳолини коронавирусга қарши эмлаш тезлиги бўйича дунёда етакчи бўлиб қолмоқда. «2021 йил марти охирига келиб, 16 ёшдан катта бўлган исроилликларнинг барчаси Pfizer/BioNTech вакцинаси билан эмлана олади», — дея мамлакат бош вазири Бинямин Нетаньяху февраль бошида эълон қилган эди.
Мавзуга доир:
- Россия Олий суди ниқоб режимини бекор қилишни рад этди. Даъвогарларнинг бир қисми ниқоб тақмагани учун судга киритилмади
- АҚШнинг Техас ва Миссисипи штатлари ниқоб тақиш мажбуриятини бекор қилди ва тадбиркорлар учун чекловларни олиб ташлади
- Удмуртия Россия ҳудудлари ичида биринчи бўлиб ниқоб тақиш мажбуриятини бекор қилди
Изоҳ (0)