18 апрель, якшанба куни Туркманистон президенти Гурбангули Бердимуҳамедовнинг отаси Маликгули Бердимуҳамедов 89 ёшида вафот этди. Бу ҳақда Республика Давлат ахборот агентлиги хабар берди.
Маликгули Бердимуҳамедов мамлакат Ички ишлар вазирлиги органларида ишлаб, Тошҳовуз, Мари, Ашхобод шаҳарларида турли лавозимларни эгаллаган, хусусан, гуруҳ қўмондони, отряд бошлиғи бўлган, навбатчилик қисмига, кадрлар бўлимига раҳбарлик қилган, штаб бошлиғи бўлган.
1982 йилда подполковник унвони билан истеъфога чиққач, кўп йиллар давомида Миллий таълим институтида, Педагогик фанлар илмий-тадқиқот институтида, Ашхобод таълим бошқармасида ишлаган, дарс берган.
2012 йил февралида Туркманистон Мажлиси (парламенти) қарори билан, пойтахтдаги 1001-сонли ҳарбий қисмга Маликгули Бердимуҳамедов номи берилган эди.
2017 йилда Маликгули Бердимуҳамедов номидаги медал таъсис этилган ва шу йили давлат раҳбари ўз отасига ва унинг ИИВдаги фаолиятига бағишланган «Мардлар Ватанни улуғлайди» китобини тақдим этган эди.
Мавзуга доир:
- Туркманистонда мамлакат президентининг отаси шарафига медал таъсис этилди
- Ашхободда Туркманбошининг отаси шарафига қўйилган ҳайкал олиб ташланди
- Гурбангули Бердимуҳамедовнинг ўғли унинг ўрнига Ахалтекин отларини етиштириш ассоциацияси раҳбарлигига сайланди
- Туркманистон президенти парламент юқори палатасининг раиси этиб сайланди
- Туркманистон президенти ойлик маошининг ярмини етимлар учун ёрдам фондига ўтказди
Изоҳ (0)