Европа Суперлигасининг ташкил этилиши ҳақида яқин орада расман маълум қилиниши мумкин, дея хабар қилмоқда Marca.
УЕФА 19 апрель куни Чемпионлар Лигасининг янгиланган форматини эълон қилиши мумкин. Шу сабабли «Реал» ва «Манчестер Юнайтед» раҳнамолигидаги Суперлига тарафдорлари мусобақанинг ташкил этилиши борасида 18 апрель куни маълум қилмоқчи.
«Реал» Key Capital компанияси билан биргаликда махфий тарзда Суперлига лойиҳаси устида ишлаган. Бундан Европанинг топ-клублари хабардор бўлган.
The New York Times хабарига кўра, камида 12 та клуб таъсисчилар қаторига кирган ёки мусобақада қатнашиш истагини билдирган. Булар АПЛнинг топ-6 клуби, Ла Лиганинг уч гранди ва А Сериянинг учта клуби: «Манчестер Юнайтед», «Ливерпуль», «Манчестер Сити», «Арсенал», «Челси», «Тоттенҳэм», «Реал Мадрид», «Барселона», «Атлетико», «Ювентус», «Милан», «Интер».
«Бавария» ва «Боруссия Д» бу мусобақада иштирок этишдан бош тортган. Шунингдек, ПСЖ ҳам бу таклифни рад этган. ПСЖ президенти Носсир ал-Ҳалайфи УЕФА директорлар кенгаши аъзоси ҳисобланади, шунингдек, у Чемпионлар Лигаси трансляция ҳуқуқини сотиб олган beIN Media Group раҳбари ҳисобланади.
Аввалроқ Суперлиганинг ҳар бир иштирокчиси йилига кафолатланган 350 миллион евро миқдоридаги пулга эга бўлиши хабар қилинганди.
Эслатиб ўтамиз, ФИФА, УЕФА ва қолган барча минтақа конфедерациялари Европа Суперлигасида қатнашган жамоаларни ўз тасарруфидаги мусобақалардан чиқариб юборишини маълум қилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)