Ўзбекистон ҳудудлари бўйлаб 17 апрель куни жами 33 208 нафар киши COVID-19’га қарши эмланди, деб хабар бермоқда Соғлиқни сақлаш вазирлиги матбуот хизмати.
Шу тариқа айни кунгача мамлакатда коронавирус инфекциясига қарши эмланган фуқаролар сони 403 136 нафарга етди.
17 апрель кунидаги эмлаш кўрсаткичлари бўйича юқори ўринларни:
- Фарғона вилояти (4545 нафар);
- Қашқадарё вилояти (4350 нафар);
- Самарқанд вилояти (4344 нафар) банд қилди.
Эслатиб ўтамиз, Ўзбекистонда бугунги кунда 1 миллион 660 минг доза вакцина бор. Уларнинг 660 минг дозаси COVAX жамғармаси томонидан олиб келинган AstraZeneca вакцинаси, 1 миллион дозаси — Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси. Ўзбекистонга апрель охирига қадар яна 1 миллион дона Хитой ва 300 минг дона «Спутник V» вакциналари олиб келиниши маълум қилинган.
Мамлакатда аҳолини коронавирусга қарши эмлаш тадбирлари 1 апрелдан вилоятлар марказлари ва катта шаҳарлардан бошланди. Май ойида эмлаш тадбирлари туман марказлари ва кичик шаҳарларда амалга оширилади. Июнь ойида эса бошқа аҳоли қатлами эмланади. 15 апрелдан бошлаб Ўзбекистонда коронавирусга қарши эмланганларга онлайн-маълумотномаларни бериш бошланди.
Изоҳ (0)