Президент администрацияси ҳузуридаги АОКА Ички ишлар вазирлиги матбуот хизмати билан ҳамкорликда гиёҳванд моддалар рекламаси жойлаштирилган манзил ҳақида хабар қабул қилувчи Telegram ботини апрель ойининг бошида ишга туширган эди.
АОКА матбуот хизматининг хабар беришича, ўтган қисқа вақт ичида мазкур ботга кенг жамоатчилик томонидан кўплаб маълумотлар келиб тушди. Ушбу маълумотлар асосида тегишли ўрганишлар олиб борилди ҳамда ижтимоий тармоқларда наркотик моддалар рекламаси, манзили ҳақида маълумот берувчи 50 дан ортиқ ресурс фаолияти тўхтатилди.
Бу борадаги ишлар изчил давом эттирилаётганини қайд этган.
Эслатиб ўтамиз, сўнгги йилларда гиёҳванд моддалар тўғрисида реклама вақти-вақти билан Тошкентнинг турли туманларида пайдо бўлаётгани ҳақида хабар берилган эди. Яқинда «Potrebitel.uz» интернет-ҳамжамияти бундай рекламалар тобора кўпайиб бораётгани ҳақидаги хабарни эълон қилди. Асосан, Чилонзор, Учтепа ва Мирзо Улуғбек туманларида бундай ҳолатлар кузатилаётгани айтилмоқда.
«Биз реклама қилинган каналларни кўрдик — у ерда ҳамма нарса очиқ, батафсил ва нархлари билан. Бундан ташқари, Тошкентда тарқатувчи сифатида ишлаш учун кўплаб таклифлар мавжуд. Каналларнинг 9-10 минг обуначиси бор. Улар гиёҳванд моддаларни сотгани учрашувга келишмайди. Пул электрон ўтказма орқали қабул қилинади, сўнгра туманнинг бирор-бир жойида белги қўйилади ва Telegram’да дозани қаердан олиш кераклиги маълум қилинади. Шунинг учун ёшлар шаҳар бўйлаб белгиларни қўйиш учун ёлланадилар», — деб қайд этилган хабарда.
Хусусан, Тошкентдаги уйлар деворида гиёҳванд моддалар рекламаси ёзувларини қолдириш билан шуғулланган икки йигит 6 апрель куни ушланганди.
Шу сабабли АОКА ИИВ билан биргаликда @stopnarko_bot Telegram-ботини ишга туширди. Гиёҳванд моддалар рекламаси ҳақида ушбу Telegram-бот орқали хабар бериш мумкин.
Изоҳ (0)