Prezident administratsiyasi huzuridagi AOKA Ichki ishlar vazirligi matbuot xizmati bilan hamkorlikda giyohvand moddalar reklamasi joylashtirilgan manzil haqida xabar qabul qiluvchi Telegram botini aprel oyining boshida ishga tushirgan edi.
AOKA matbuot xizmatining xabar berishicha, o‘tgan qisqa vaqt ichida mazkur botga keng jamoatchilik tomonidan ko‘plab ma’lumotlar kelib tushdi. Ushbu ma’lumotlar asosida tegishli o‘rganishlar olib borildi hamda ijtimoiy tarmoqlarda narkotik moddalar reklamasi, manzili haqida ma’lumot beruvchi 50 dan ortiq resurs faoliyati to‘xtatildi.
Bu boradagi ishlar izchil davom ettirilayotganini qayd etgan.
Eslatib o‘tamiz, so‘nggi yillarda giyohvand moddalar to‘g‘risida reklama vaqti-vaqti bilan Toshkentning turli tumanlarida paydo bo‘layotgani haqida xabar berilgan edi. Yaqinda “Potrebitel.uz” internet-hamjamiyati bunday reklamalar tobora ko‘payib borayotgani haqidagi xabarni e’lon qildi. Asosan, Chilonzor, Uchtepa va Mirzo Ulug‘bek tumanlarida bunday holatlar kuzatilayotgani aytilmoqda.
“Biz reklama qilingan kanallarni ko‘rdik — u yerda hamma narsa ochiq, batafsil va narxlari bilan. Bundan tashqari, Toshkentda tarqatuvchi sifatida ishlash uchun ko‘plab takliflar mavjud. Kanallarning 9-10 ming obunachisi bor. Ular giyohvand moddalarni sotgani uchrashuvga kelishmaydi. Pul elektron o‘tkazma orqali qabul qilinadi, so‘ngra tumanning biror-bir joyida belgi qo‘yiladi va Telegram’da dozani qayerdan olish kerakligi ma’lum qilinadi. Shuning uchun yoshlar shahar bo‘ylab belgilarni qo‘yish uchun yollanadilar”, — deb qayd etilgan xabarda.
Xususan, Toshkentdagi uylar devorida giyohvand moddalar reklamasi yozuvlarini qoldirish bilan shug‘ullangan ikki yigit 6-aprel kuni ushlangandi.
Shu sababli AOKA IIV bilan birgalikda @stopnarko_bot Telegram-botini ishga tushirdi. Giyohvand moddalar reklamasi haqida ushbu Telegram-bot orqali xabar berish mumkin.
Izoh (0)