Тошкент шаҳридаги мактабларнинг бирида ўқувчиларнинг калта пайпоқ кийган-киймагани текширилди. Бу ҳақда блогер, адлия вазирининг давлат тили масалалари бўйича маслаҳатчиси Шаҳноза Соатова Telegram’даги каналида маълум қилди. Унинг қайд этишича, бу ҳолат болаларга ЛГБТга қарши кураш, деб тушунтирилган.
«Кеча ўғлимнинг синфига кириб, дарс пайти болаларнинг оёқ кийимини ечтириб, пайпоғини кўришибди: калтами-узунми? Калта пайпоқли оёқларни суратга олишибди. Буни ЛГБТга қарши кураш, деб тушунтиришибди», — деб ёзади блогер.
Шунингдек, у мактабларга дарс ўрнига ЛГБТ мавзусини ортиқча эслатадиган маърузалар кириб борганини қоралаган.
«Дарс ўрнига ЛГБТ мавзусини ортиқча эслатадиган маърузалар кириб бордими мактабларга? Абсурд даражага олиб чиқяпсизлар-ку антитарғиботни. Мавзуни ёпинглар энди, ҳеч бўлмаса, мактабларда! Мен буни ҳам ЛГБТ тарғиботи деб баҳолайман, қора пиар ҳам пиар, ахир», — дейди Шаҳноза Соатова.
Унинг суриштирувига кўра, халқ таълими тизимидан бундай топшириқ берилмаган.
«Демак, бошқа бир ташкилотнинг топшириғи. Биз болаларимизни мактабга жўнатар эканмиз, уларнинг таълимини ҳам, тарбиясини ҳам ўзимиз танийдиган, болаларимиз билан бевосита мулоқотда бўладиган ўқитувчисига ва мактабга ишонамиз. Бироқ мактабга хўжайин кўп, ҳамма ўзининг ‘йўл харитаси’ни, дастурини бажариши керак, шунга дарс пайти эшикни тепиб кириб бораверишади. Дарс муқаддас, таълим муқаддас деган тушунча йўқ. Ҳар сафар болалар мактабдан «дарсда формамизни текширди, галстук тақмаганларни уришди» деб келганида, барбод бўлган дарсга ачинаман», — деб таъкидлаган у.
Адлия вазирининг давлат тили масалалари бўйича маслаҳатчисининг таъкидлашича, тарбия соатига айланиб, ЛГБТнинг калта пайпоққа боғлиқлиги тўғрисида маъруза ўқилган 20 дақиқа ўзбек тили дарсида бўлган.
«Тил жонкуяри сифатида менга икки карра аламли бу ҳол. Шу 20 дақиқалик билимнинг ўрнини қачон тўлдириш тўғрисида ўша «йўл харита»ларида нимадир дейилганми? Нечта синфда қанчалаб 20-30 дақиқалар кетяпти бунга? Саводи, билими бўлмаган одамни маънавиятли қилиш мушкуллигини, ҳамма эзгуликлар, юксак маънавият ҳам, аввало билим ва савод устига қурилишини билмаймизми?
Юмшоқ тарғибот йўлидан бориб, тарбияни дарс ва таълим тизимига аралашмаган ҳолда, дарсларда маъруза эмас, дарсдан ташқарида юксак қадриятларни акс эттирган санъат, адабиёт асарларини саҳналаштириш, томоша қилиш, бепул тўгараклар фаолиятини ривожлантириш орқали амалга оширса бўлмайдими?», — деган у.
«Айтганча, ким қайси конспирологик назарияга ишонса, ўзининг иши. Лекин бола пайпоғининг узунлигини ўзи ва ота-онаси ҳал қилади!», — дея сўзларини якунлаган Шаҳноза Соатова.
Эслатиб ўтамиз, «Муносабат» ижтимоий-сиёсий телекўрсатувида Республика Маънавият ва маърифат маркази бўлим бошлиғи Мансур Мусаев Европада калта пайпоқ ноанъанавий жинсий ориентация вакилларининг рамзи эканлигини айтганди.
Изоҳ (0)