Тошкент метрополитенининг Сергели йўналишидаги «3-бекат» станциясида вақтни кўрсатувчи соат дарчасида ҳаракатланувчи сатрда ножўя гап акс эттирилган видео ижтимоий тармоқларда тарқалди. «Тошкент метрополитени» УК мазкур ҳолатга изоҳ берди.

Фото: «Дарё»

«Ушбу ҳодиса бўйича ички хизмат текшируви ўтказилди. Унга кўра, 12 апрель куни соат 16:40 да ушбу вақтни кўрсатувчи соат механизмига хакерлар томонидан киберҳужум (бузиб кириш) содир бўлганлиги аниқланди. Ушбу дарча электрон тизимли бўлиб, Wi-Fi орқали бошқарилади. Ҳужумчилар соатга ўрнатилган паролни бузиб, ножўя гапни ҳаракатланувчи сатрга жойлаштирган», — дейилади пойтахт метрополитени хабарида.

Қайд этилишича, ушбу ёзув 4 дақиқа ичида олиб ташланган. Ҳуқуқни муҳофаза қилиш органлари томонидан айбдорлар қидирилмоқда ва уларга нисбатан тегишли чоралар кўрилади.

«Тошкент метрополитени» УК раҳбарияти телекоммуникация тармоғига ноқонуний (санкциясиз) уланишга нисбатан жиноий жавобгарлик белгиланганлигини эслатиб ўтган.

Аввалроқ Тошкентдаги метро поезди йўловчилар ҳаётини хавфга қўйиб очиқ эшик билан ҳаракатлангани ҳақида хабар берилган эди. «Тошкент метрополитени» раҳбарияти содир бўлган воқеа юзасидан кечирим сўраган ва ушбу ҳолат бўйича хизмат текшируви ўтказилаётгани, жумладан, вагон ва станциядаги видеоёзувлар ўрганилаётганини маълум қилган.