БМТ Мьянмада «Сурия сценарийси» такрорланиши хавфидан огоҳлантирди
Мьянмадаги кескинликнинг ортиши 2011 йилда Сурияда бўлгани каби йирик қуролли тўқнашувга олиб келиши мумкин. Бу ҳақда Бирлашган Миллатлар Ташкилоти (БМТ)нинг Инсон ҳуқуқлари бўйича Олий комиссари Мишель Бачелет айтиб ўтди, деб ёзади «Интерфакс».
«Мен Мьянмадаги вазият кенг миқёсли можаро томон кетаётганидан қўрқаман. Бошқа мамлакатлар ўтмишда Сурия ва бошқа жойларда содир бўлган ҳалокатли хатоларни такрорлашга йўл қўйилмаслиги керак», — деди Бачелет.
«Ҳозирги воқеалар шубҳасиз, 2011 йилги Суриядаги воқеалар акс-садосини бермоқда. Биз у ерда ҳам тинч норозилик намойишларини кўргандик, кераксиз ва афтидан мантиқсиз равишда куч ишлатилганига гувоҳ бўлгандик», — дея изоҳлади у.
Унинг сўзларига кўра, Мьянма ҳарбийлари намойишчиларга қарши ҳаракатларини кучайтиришни мақсад қилган кўринади. Ўтган ҳафта охирида мамлакатнинг турли ҳудудларида кескин зўравонликлар кузатилган: масалан, Баго шаҳрида жума ва шанба кунлари 82 киши ўлдирилган.
Шунингдек, Качин, Шан ва Карен штатларида ҳарбий самолётлардан фойдаланилган ҳолда ҳарбий ва озчилик қуролли кучлар ўртасидаги тўқнашувлар ҳақида хабарлар мавжуд. Ҳаммаси бўлиб камида 3080 киши ҳибсга олинган ва ҳибсга олишлар давом этмоқда.
Бачелет, шунингдек, халқаро ҳамжамиятни Мьянмадаги вазиятга аралашишга чақириб, «қоралаш ва чекланган мақсадли санкциялар» ҳозирги вазиятда етарли эмаслигини таъкидлади.
Аввалроқ Мьянмада содир бўлган ҳарбий тўнтариш ва янги ҳукуматга қарши норозилик намойишлари фонида сўнгги икки ой ичида камида 43 нафар бола ҳарбийлар томонидан ўлдирилгани ҳақида хабар берилганди.
Март ойининг бошида ҳам Мьянмадаги полиция ҳамда кўчаларда намойиш ўтказаётган фуқаролар ўртасидаги тўқнашувларда ҳуқуқ-тартибот идоралари ходимларининг ўқотар қуролдан фойдаланиши оқибатида 38 кишининг ҳалок бўлгани маълум қилинган.
Март ойининг охирида Мьянмада ҳукуматни бошқараётган ҳарбийлар мамлакатда сайловлар қайтадан ўтказилганидан кейин бошқарувни янги сайланган вакилларга топширишни ваъда қилди.
