Ўзбекистон Европа Иттифоқининг GSP+ преференциялар дастурига қабул қилинди. Бу ҳақда «Юксалиш» умуммиллий ҳаракати раиси, Олий Мажлис депутати Бобур Бекмуродов ўзининг Telegram’даги канали орқали хабар берди.
Бекмуродовнинг ёзишича, GSP+ иштирокчиси сифатида Ўзбекистон стандарт GSP схемасидан кўра кўпроқ қўшимча иқтисодий манфаатларни олади. Яъни Стандарт GSP линиясининг 2/3 қисми маҳсулотлар линейкаси бўйича тарифлар бекор қилинади.
«Бугунги кунда мамлакатимиз Европа Иттифоқига 3000 турдаги маҳсулот божхона тарифларисиз ва 3200 турдаги маҳсулот арзонлаштирилган тўловлар асосида экспорт қилаётган бўлса, 10 апрелдан бошлаб Ўзбекистон GSP+ иштирокчиси сифатида 6200 турдаги маҳсулотларни божхона божисиз ЙИ ҳудудига экспорт қилиш мумкин», — деб ёзади у.
Маълум қилинишича, GSP+ схемасидан бугунги кунда 9 та давлат фойдаланмоқда, МДҲ давлатларидан яна Арманистон ва Қирғизистон ҳам бенефициар ҳисобланади.
GSP+ схемаси қатор мажбуриятларни ҳам юклайди. Масалан, мамлакат инсон ҳуқуқлари, экология, меҳнат ҳуқуқлари, самарали бошқарувга оид 27 та Халқаро конвенцияларни самарали бажариш мажбуриятини олади. Бундан ташқари, Европа Иттифоқи Ўзбекистон томони иккита қонун — Жиноят ҳамда Меҳнат кодексларини қайта кўриб чиқиши жараёнига эътибор қаратаётганини расман маълум қилган.
Эслатиб ўтамиз, март бошида Европа Иттифоқининг Ўзбекистондаги делегацияси раҳбари этиб тайинланган элчи Шарлотта Адрианни Абдулазиз Комилов билан учрашувда Ўзбекистонга GSP+ мақоми 2021 йил март ойининг охирига қадар берилишига умид билдирганди.
Изоҳ (0)