O‘zbekiston Yevropa Ittifoqining GSP+ preferensiyalar dasturiga qabul qilindi. Bu haqda “Yuksalish” umummilliy harakati raisi, Oliy Majlis deputati Bobur Bekmurodov o‘zining Telegram’dagi kanali orqali xabar berdi.
Bekmurodovning yozishicha, GSP+ ishtirokchisi sifatida O‘zbekiston standart GSP sxemasidan ko‘ra ko‘proq qo‘shimcha iqtisodiy manfaatlarni oladi. Ya’ni Standart GSP liniyasining 2/3 qismi mahsulotlar lineykasi bo‘yicha tariflar bekor qilinadi.
“Bugungi kunda mamlakatimiz Yevropa Ittifoqiga 3000 turdagi mahsulot bojxona tariflarisiz va 3200 turdagi mahsulot arzonlashtirilgan to‘lovlar asosida eksport qilayotgan bo‘lsa, 10-apreldan boshlab O‘zbekiston GSP+ ishtirokchisi sifatida 6200 turdagi mahsulotlarni bojxona bojisiz YI hududiga eksport qilish mumkin”, — deb yozadi u.
Ma’lum qilinishicha, GSP+ sxemasidan bugungi kunda 9 ta davlat foydalanmoqda, MDH davlatlaridan yana Armaniston va Qirg‘iziston ham benefitsiar hisoblanadi.
GSP+ sxemasi qator majburiyatlarni ham yuklaydi. Masalan, mamlakat inson huquqlari, ekologiya, mehnat huquqlari, samarali boshqaruvga oid 27 ta Xalqaro konvensiyalarni samarali bajarish majburiyatini oladi. Bundan tashqari, Yevropa Ittifoqi O‘zbekiston tomoni ikkita qonun — Jinoyat hamda Mehnat kodekslarini qayta ko‘rib chiqishi jarayoniga e’tibor qaratayotganini rasman ma’lum qilgan.
Eslatib o‘tamiz, mart boshida Yevropa Ittifoqining O‘zbekistondagi delegatsiyasi rahbari etib tayinlangan elchi Sharlotta Adrianni Abdulaziz Komilov bilan uchrashuvda O‘zbekistonga GSP+ maqomi 2021-yil mart oyining oxiriga qadar berilishiga umid bildirgandi.
Izoh (0)