Ўзбекистонда коронавирусга қарши эмланганлар сони 83 минг кишидан ошди

Ўтган бир сутка ичида Тошкент ва Нукус шаҳарлари ҳамда вилоят марказларида коронавирус инфекциясига қарши яна 18 224 киши эмланди, деб хабар бермоқда Соғлиқни сақлаш вазирлиги матбуот хизмати.

Ўзбекистонда шу кунгача мамлакатда коронавирус инфекциясига қарши эмланган фуқаролар сони 83 076 нафарга етди.

8 апрель кунидаги эмлаш кўрсаткичлари бўйича юқори ўринларни

• Наманган вилояти (2698 нафар),
• Сурхондарё вилояти (2110 нафар),
• Андижон вилояти (1895 нафар),
• Қашқадарё вилояти (1760 нафар),
• Хоразм вилояти (1591 нафар),
• Фарғона вилояти (1487 нафар),
• Жиззах вилояти (1150 нафар),
• Самарқанд вилояти (1140 нафар),
• Тошкент шаҳри (1078 нафар),
• Тошкент вилояти (1029 нафар) банд қилди.

ССВ маълумотларига кўра, Тошкентдан кейин Наманган вилоятида ҳам коронавирусга қарши эмланган аҳоли 10 минг нафардан ошган.

Эслатиб ўтамиз, аҳолини коронавирусга қарши эмлаш тадбирлари 1 апрелдан бошланди. Эмлаш дастлаб қариялар, соғлиқни сақлаш ходимлари, ОАВ вакилларида кўнгилли тарзда ўтказилади. 7 апрель ҳолатига кўра, мамлакат бўйлаб 15 250 киши коронавирусга қарши эмланган эди.

Улар AstraZeneca ва Ўзбекистон—Хитой ҳамкорлигида ишлаб чиқилган ZF-UZ-VAC 2001 вакцинаси билан эмланмоқда. Бунда эмланувчи биринчи эмланишни қайси вакцина билан бошласа, иккинчисини ҳам айнан ўша вакцина билан якунлайди.