Innovatsion rivojlanish vazirligi huzuridagi Ilg‘or texnologiya markazining laboratoriya mudiri Dilbar Dolimova O‘zbekistonda nega ZF-UZ-VAC 2001 vaksinasining klinik sinovlari oxiriga yetmasdan turib, undan foydalanishga ruxsat berilgani to‘g‘risidagi savollarga javob qaytardi.

Foto: “Daryo” / Madina Nurman

E’tibor bergan bo‘lsangiz, COVID-19 virusiga qarshi yaratilgan vaksinalarning hech birining to‘liq klinik sinovlari tugamagan. Butun dunyoda pandemiya sharoitida favqulodda qo‘llash uchun ruxsatnoma berish tartibi mavjud. Favqulodda qo‘llash uchun ruxsatnoma hali ro‘yxatdan o‘tmagan dori vositasini tibbiy favqulodda vaziyatlar davrida qo‘llash uchun ruxsat berilish holati hisoblanadi. Vaksinatsiya olib borilayotgan barcha davlatlarda ushbu tamoyil asosida vaksinalar ro‘yxatga olinmoqda.

Xuddi shuningdek, O‘zbekistonda ham COVID-19 pandemiyasini nazorat qilish uchun favqulodda qo‘llash tamoyiliga amal qilindi. Bunda ZF-UZ-VAC 2001 vaksina sinovining I va II faza xavfsizlik ma’lumotlari va III fazada vaksina olganlarning kamida 50 foizi ikki oy davomida kuzatilganligi, hamda natijalar mazkur vaksinaning nisbatan yuqori xavfsizlik profiliga ega ekanligini ko‘rsatdi. Shu sababdan ham ZF-UZ-VAC 2001 vaksinasini O‘zbekiston va Xitoyda favqulodda qo‘llash uchun ruxsat berildi.

Dilbar Dolimova, Ilg‘or texnologiya markazining laboratoriya mudiri

Eslatib o‘tamiz, aholini koronavirusga qarshi emlash tadbirlari 1-apreldan boshlandi. Emlash dastlab qariyalar, sog‘liqni saqlash xodimlari, OAV vakillarida ko‘ngilli tarzda o‘tkaziladi. 5-aprel holatiga ko‘ra, mamlakatda 35 mingdan ortiq kishi koronavirusga qarshi emlandi.

Ular AstraZeneca va O‘zbekiston—Xitoy hamkorligida ishlab chiqilgan ZF-UZ-VAC 2001 vaksinasi bilan emlanmoqda. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi.