«Севимли» телеканалининг «Хайрли оқшом» кўрсатувида эл суйган қизиқчи Мирзабек Холмедовнинг яхши шоир ҳам эканлиги ҳақида ҳикоя қилинди. Маълум бўлишича, Мирзабек Холмедов Юлдуз Усмонова, Рустам Ғоипов, Муҳриддин Холиқов ва Ҳосила Раҳимова каби машҳур санъаткорларининг хит қўшиқлари муаллифи ҳисобланади.
«Ўзбекистон ҳаво йўллари ҳақида фильм суратга олинган. Унда биз Бекзод Муҳаммадкаримов билан бирга учувчиларни ўйнаганмиз. Америкага бориб суратга тушганмиз, шу фильмда бир сўз бўларди кўпкари ҳақида. ‘Бос, бос қамчи бос, от чоптир, йигитга мос’ деб рок йўналишида ижро этганмиз. Шеърни Ҳосила Раҳимовага таклиф қилганман. Усмон Азим сурхонча шевага мослаб берган. Шу қўшиқ кейин машҳур бўлиб кетди», — дея ҳикоя қилади Мирзабек Холмедов.
Шунингдек, Мирзабек Холмедов Муҳриддин Холиқовнинг «Эй гўзал» хит таронасининг ҳам муаллифидир. Мирзабек Холмедов ушбу қўшиқни 25-26 ёшларида тўйларда ижро этган.
«Муҳриддин акам қўшиғимни ёқтириб қолдилар. ‘Мен айтсам майлими, деб сўрадилар. Ҳа, олинг, ‘метирка’си билан сизга, дедим. Муҳаммад Юсуф концертларимизга келардилар, шу қўшиқни эшитиб, сўзларини ким ёзганини сўради. Менга одамнинг қулоғига ёқувчи ёқимли сўзларни танлабсан, деб китобларини бердилар. Сени ҳеч ким тушунмайди менингдек, деб ёзиб бердилар», — дейди Мирзабек Холмедов.
Муҳриддин Холиқов Мирзабек Холмедовнинг «Қандоқ қилай?», «Хато бўлди», «Ошиқлар» деб номланган шеърларини ҳам қўшиқ қилган. Ўзбекистон халқ артисти Юлдуз Усмонованинг «Болажон», «Ёрмисиз, золиммисиз?» каби қўшиқларининг шеърлари муаллифи ҳам Мирзабек Холмедов ҳисобланади.
Изоҳ (0)