Қашқадарё ҳокими Зоир Мирзаев вилоятда коронавирус билан оғриган беморларни даволовчи, Германиядан олиб келинган кислород станциялари масъуллар эътиборсизлиги сабаб ҳамон ишлатилмаётганини, ҳатто шифохоналарга ҳам ўрнатилмаганини маълум қилди. Бу ҳақда Зоир Мирзаев бошчилигидаги раҳбарларнинг Касби халқи билан бўлган мулоқотида айтиб ўтилди, дея хабар берди «Дарё» мухбири.
Таъкидланишича, 2021 йил 2 апрель куни вилоят раҳбари Зоир Мирзаев бошчилигидаги масъуллар Касби туманининг Фазли қишлоғида бўлиб, аҳолига 2021 йилда туманда амалга оширилиши лозим бўлган ишлар ҳақида ҳисоб берган.
«Вилоятимизга ҳурматли президентимизга айтиб, қиймати салкам 2 миллиард сўм бўлган учта кислород станциясини олиб келгандик. Аммо минг афсуски, вилоят соғлиқни сақлаш бошқармаси бошлиғи ўринбосарининг масъулиятсизлиги сабаб кислород станциялари ҳалигача ўрнатилмаган. Ишлатилиши ҳақида-ку, гапирмасак ҳам бўлади. Мен бунинг сабабини сўрадим. ‘Бўлди, муаммо йўқ. Беш-олти кунда ўрнатиб, ишлатамиз’, деяпти. Хўш, қандай қилиб, бу одам билан гаплашиб бўлади? Ҳар куни одамлар ҳаво деб, кислород деб ёца-ю, бу одам беш-олти кунда ўрнатамиз деб, тайёр кислороддан фойдаланмаса? Ўрнатилса, икки соатда ишлай бошлайди-ку. Ҳаводан кислородни олиб берадиган Германиянинг ускунаси. Энг замонавий, битта касалхонани биттаси тўлиқ таъминлайди. Кислород баллон ҳам ташиб юришга ҳожат қолмайди. Ундан тезроқ фойдаланишимиз керак. Юқумли касалликлар шифохонасида олти нафар бемор коронавирусга қарши даволаняпти. Улар кўпаймайди деб кафолат бериб бўлмайди-ку», — деди вилоят ҳокими.
Зоир Мирзаев шунингдек, вилоятда тўй ва тадбирлар ҳамон кўпчилик билан ўтаётганини, карантин қоидаларига ҳар доим ҳам амал қилинмаётганини эслатиб, «Маҳаллага фарқи йўқ, докторга фарқи йўқ, СЭСга фарқи йўқ, ким тарғибот қилади?», — деди.
«Вакцинация жараёни бошланди, кеча ҳам (2021 йил 1 апрель назарда тутилмоқда) 400 нафарга яқин одам вакцина олди. Одамларга буни тушунтириб бериб, ким вакцинация жараёнларини тугатади. Давлат бепул вакцина бергач, нега уни тарғибот қилиб, аҳолига етказиб бериб, эмлаш жараёнини ташкил қилолмаймиз? Ваҳоланки, биринчилардан бўлиб эмланиши лозим бўлганлар рўйхатида тиббиёт ходимларининг ўзи турибди», — деди Зоир Мирзаев.
Вилоят раҳбарининг қўшимча қилишича, у аҳолига намуна бўлиб эмлашни биринчи олган ва олаётган бош шифокорлар рўйхати билан ҳам қизиққан.
«Мен кеча сўрадим, қани қайси бош шифокор биринчи бўлиб эмлашни олди. Ўзи одамларга намуна бўляптими? Мен қайси бош шифокор эмлашни олаётганини сўрадим, бугун кечки пайт (2021 йил 2 апрель назарда тутилмоқда) рўйхатини беришса, аниқ бўлади», — деди ҳоким Зоир Мирзаев.
Изоҳ (0)