Данияда AstraZeneca билан эмланган тиббиёт ходими вафот этди, Польшада эса аҳоли ушбу вакцинани қабул қилишдан оммавий бош тортмоқда

Данияда AstraZeneca вакцинаси билан эмланган икки нафар тиббиёт ходими касалхонага ётқизилди. Кейинроқ улардан бири вафот этди, деб ёзади «РБК».

Дания дори воситалари агентлиги хабарига кўра, иккала тиббиёт ходими ҳам касалхонага ётқизилишдан камида 14 кун аввал AstraZeneca вакцинаси билан эмланган.

ExtraBladet газетасига кўра, касалхонага 30 ёшли аёл келтирилган. Унда қон кетиши, қон қуюлиб қолиши ва тромбоцитларнинг паст даражаси кузатилган. Иккинчи бемор — вафот этган шахс эса эркак киши бўлган. Унинг ўлимига айнан нима сабаб бўлгани маълум қилинмаяпти.

Аввалроқ Норвегияда AstraZeneca вакцинаси билан эмланганидан кейин шифохонага ётқизилган тиббиёт ходими вафот этган эди.

Шунингдек, Грузиянинг Ахалсихе шаҳрида тиббиёт муассасаларидан бирининг ходимаси AstraZeneca вакцинаси билан эмланганидан кейин комага тушиб қолди. 27 ёшли ҳамширада анафилактик шок юзага келгани тахмин қилинмоқда. Ҳамкасблари сўзларига кўра, унинг аҳволи оғир. Грузия соғлиқни сақлаш вазирлиги AstraZeneca билан эмланган жами уч мингдан ортиқ одамнинг беш нафарида иккиламчи асоратлар кузатилганини тасдиқлади.

Айни пайтда Польшада эса AstraZeneca Британия-Швеция компаниясининг минглаб дозадаги вакциналари фойдаланмасдан қолиб кетмоқда: фуқаролар ушбу дори билан эмланишдан бош тортмоқда.

«Сўнгги кунларда AstraZeneca вакцинаси билан эмланиш учун рўйхатдан ўтаётган одамлар сони бир неча ўн фоизга пасайиб кетди. Бир неча юз минглаб вакцина одамлар келмагани учун вакцинация пунктларида фойдаланилмасдан ётибди», — деди Польша ҳукумати раҳбарининг матбуот котиби Михал Дворчик. Шу билан бирга, у пандемияни енгиш учун фуқароларни эмланишга чақирди.

Эслатиб ўтамиз, AstraZeneca вакцинаси билан эмланганларнинг қонида тромб пайдо бўлгани ҳақидаги хабарлардан сўнг бир қатор мамлакатлар препаратдан фойдаланишни тўхтатиб қўйганди. Хусусан, Германия, Франция, Италия, Испания, Словения, Португалия, Кипр, Нидерландия, Австрия, Дания, Эстония, Латвия, Литва, Болгария, Ирландия, Люксембург, Норвегия ва Исландия, шунингдек, Европадан ташқаридаги Индонезия, Конго ва Жанубий Африка мамлакатларида мазкур вакцинадан фойдаланиш тўхтатилган.

Европа дори-дармон агентлиги (ЕМА) коронавирусга қарши AstraZeneca вакцинаси хавфсиз ва самарали деб эълон қилгач, Европа давлатлари ушбу препарат билан эмлашни қайта бошлади. Хусусан, Германия, Франция, Италия, Испания, Болгария, Португалия ва Словения, шунингдек, Канада ва Латвияда ҳам AstraZeneca билан эмлашни қайта бошлашга рухсат берилди.