Айни пайтда Президент Шавкат Мирзиёев раислигида ўтказилаётган Халқ депутатлари Тошкент вилояти кенгашининг навбатдан ташқари 28-сессиясида давлат раҳбари Даврон Ҳидоятовни вилоят ҳокими лавозимига тавсия қилди, дея хабар бермоқда «Дарё» мухбири. Тавсия этилган номзод вилоят кенгаши депутатлари томонидан бир овоздан қўллаб-қувватланди.
Президент Тошкент вилояти ҳокими лавозимига номзоди тасдиқланган Даврон Ҳидоятов ҳақида фикр билдираркан, хусусан, шундай деди: «Ҳидоятовни ўзим яхши биламан, ёнимда кўп йиллар ишлаган. Вазир бўлиб ишлаётганида, Чилонзорга ҳоким бўлишини айтганман. У ўшанда ‘Мен вазирман-ку, қандай ҳоким бўламан?’, деган. ‘Ҳоким бўласан, пастга тушиб, пиёда юрасан, халқ ичида кун кечирасан’, деганман. Кейин у билан кўришганимда, миннатдорлик билдирган. Маълум муддат Тошкент шаҳар ҳокимининг биринчи ўринбосари ҳам бўлди.
Ҳидоятов билимли, ўз устида ишлайдиган, ҳаракатчан ва ҳозирги замон талабларини тўғри тушунадиган одам. Бундай кадрлардан ҳар бир вилоятда 4-5 тадан бўлганида эди, яна анча ривожланиб кетардик. У Тошкент вилоятига вақтинчалик ҳоким вазифасига тайинланган пайтда, бир неча маротаба суҳбатлашдим. ‘Шавкат Миромонович, жуда қийналаман, оғир бўлади’, деган. Лекин мен унга ишонаман, вилоятда ўзгаришлар қиладиган салоҳиятга эга», — деди давлат раҳбари.
Маълумот учун, Даврон Ҳидоятов 1976 йилда Тошкент шаҳрида туғилган. У Тошкент давлат иқтисодиёт университети (1998 йил) ва Ўзбекистон банк-молия академиясини (2001 йил) тамомлаган. 1996−2003 йилларда Ўзбекистон Марказий банки тизимида, 2004—2005 йилларда «Осиё инвест банк» (Москва) бошқаруви раиси лавозимида, 2005—2009 йилларда Ўзбекистон Марказий банки тизимида ишлаган.
2009 йилдан 2012 йилгача GM Uzbekistan компаниясининг молия бўйича ижрочи директори, 2012 йилдан 2014 йилгача MAN Auto-Uzbekistan ҚК бош директори лавозимларида хизмат қилган.
2014—2017 йилларда Ўзбекистон Хусусийлаштириш, монополиядан чиқариш ва рақобатни кучайтириш давлат қўмитаси раиси, 2017—2018 йилларда Чилонзор тумани ҳокими, 2018—2021 йилларда Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари лавозимида фаолият юритган.
Изоҳ (0)