Ayni paytda Prezident Shavkat Mirziyoyev raisligida o‘tkazilayotgan Xalq deputatlari Toshkent viloyati kengashining navbatdan tashqari 28-sessiyasida davlat rahbari Davron Hidoyatovni viloyat hokimi lavozimiga tavsiya qildi, deya xabar bermoqda “Daryo” muxbiri. Tavsiya etilgan nomzod viloyat kengashi deputatlari tomonidan bir ovozdan qo‘llab-quvvatlandi.
Prezident Toshkent viloyati hokimi lavozimiga nomzodi tasdiqlangan Davron Hidoyatov haqida fikr bildirarkan, xususan, shunday dedi: “Hidoyatovni o‘zim yaxshi bilaman, yonimda ko‘p yillar ishlagan. Vazir bo‘lib ishlayotganida, Chilonzorga hokim bo‘lishini aytganman. U o‘shanda ‘Men vazirman-ku, qanday hokim bo‘laman?’, degan. ‘Hokim bo‘lasan, pastga tushib, piyoda yurasan, xalq ichida kun kechirasan’, deganman. Keyin u bilan ko‘rishganimda, minnatdorlik bildirgan. Ma’lum muddat Toshkent shahar hokimining birinchi o‘rinbosari ham bo‘ldi.
Hidoyatov bilimli, o‘z ustida ishlaydigan, harakatchan va hozirgi zamon talablarini to‘g‘ri tushunadigan odam. Bunday kadrlardan har bir viloyatda 4-5 tadan bo‘lganida edi, yana ancha rivojlanib ketardik. U Toshkent viloyatiga vaqtinchalik hokim vazifasiga tayinlangan paytda, bir necha marotaba suhbatlashdim. ‘Shavkat Miromonovich, juda qiynalaman, og‘ir bo‘ladi’, degan. Lekin men unga ishonaman, viloyatda o‘zgarishlar qiladigan salohiyatga ega”, — dedi davlat rahbari.
Ma’lumot uchun, Davron Hidoyatov 1976-yilda Toshkent shahrida tug‘ilgan. U Toshkent davlat iqtisodiyot universiteti (1998-yil) va O‘zbekiston bank-moliya akademiyasini (2001-yil) tamomlagan. 1996−2003-yillarda O‘zbekiston Markaziy banki tizimida, 2004—2005-yillarda “Osiyo invest bank” (Moskva) boshqaruvi raisi lavozimida, 2005—2009-yillarda O‘zbekiston Markaziy banki tizimida ishlagan.
2009-yildan 2012-yilgacha GM Uzbekistan kompaniyasining moliya bo‘yicha ijrochi direktori, 2012-yildan 2014-yilgacha MAN Auto-Uzbekistan QK bosh direktori lavozimlarida xizmat qilgan.
2014—2017-yillarda O‘zbekiston Xususiylashtirish, monopoliyadan chiqarish va raqobatni kuchaytirish davlat qo‘mitasi raisi, 2017—2018-yillarda Chilonzor tumani hokimi, 2018—2021-yillarda Toshkent shahar hokimining arxitektura, kapital qurilish va kommunikatsiyalarni rivojlantirish masalalari bo‘yicha birinchi o‘rinbosari lavozimida faoliyat yuritgan.
Izoh (0)