Қибрайдаги цехда юз берган ёнғинда бир ишчи ўлди. Корхонанинг ёнғинга қарши ҳолати ишга тушганидан бери бирор марта текширилмаган

Қибрай тумани Дўстлик кўчасидаги Progress Roman компаниясига тегишли ишлаб чиқариш ҳудудида 3 февралга ўтар кечаси ёнғин чиққан. Бош прокуратура матбуот хизматидан «Дарё»га маълум қилишларича, «ёнғин содир бўлган бинода 42 ёшли фуқаронинг мурдаси топилган».

Бош прокуратуранинг қўшимча қилишича, «ҳолат юзасидан туман прокуратураси томонидан судга оид тиббиёт экспертизаси тайинланган, терговга қадар текширув ҳаракатлари олиб борилмоқда». Тошкент вилояти Фавқулодда вазиятлар бошқармасидан маълум қилишларича, ёнғин оқибатида «ГАЗель» юк машинаси ҳам ёниб кетган.

Вилоят ФВБнинг қайд этишича, ёнғин Progress Roman’га тегишли ҳудудда 2019 йилдан бери шартнома асосида фаолият юритаётган якка тартибдаги тадбиркор Князевга тегишли цехда юз берган. «Ёнғин содир бўлгунга қадар ҳудуднинг ёнғинга қарши ҳолати бирор марта текширувдан ўтказилмаган», – дейилади бошқарма маълумотида.

Бошқарма вакиллари текширувлар ўтказилмаганига Ўзбекистонда сўнгги йилларда тадбиркорлик субъектларида текширишлар ўтказишга мораторий жорий қилинганини сабаб қилиб кўрсатган. Юз берган фожиадан сўнг бундай ҳолат қайта такрорланмаслиги учун ҳам текширув ўтказиладими, деган саволга вилоят ФВБ жавоб бермади.

Ёнғин содир бўлган ҳудуддан устидан юқори кучланишни электр симлари ўтган. Бундай иншоотлар яқинида бинолар қуриш, ишлаб чиқариш ташкил этиш белгиланган талаб ва қоидаларга қанчалик мувофиқлиги тўғрисида берилган сўровга «Ҳудудий электр тармоқлари» компанияси жавоб бермади.