АҚШ ва Буюк Британия кимёвий қуролдан фойдалангани учун Россияга қарши янги санкциялар жорий қилиш масаласини муҳокама қилмоқда. Олигархлар ва Россия давлат қарзи чекловлар остида қолиши мумкин, деб ёзади Bloomberg ўз манбаларига асосланиб.
Фото: «РИА Новости»
«Магницкий рўйхати» (Мамлакатга кириши тақиқланган шахслар рўйхати) бўйича санкциялар АҚШ ҳукумати наздида инсон ҳуқуқларини бузиш ёки коррупция схемаларида иштирок этган россиялик ишбилармонларга нисбатан қўлланиши мумкин. Икки нафар расмийнинг Bloomberg нашрига берган маълумотига кўра, агар Вашингтон яна бир бор Москвани кимёвий қуролдан фойдаланиш тақиқини бузганликда гумон қилса, президент Жо Байден Россия миллий қарзига нисбатан санкциялар қўллаш масаласини кўриб чиқади.
Қўшма Штатлар «Скрипаллар иши» (Совет, Россия ва Буюк Британия ҳарбий разведкаси ходими Сергей Скрипал ва унинг қизи Юлиянинг заҳарланиши) доирасида 2019 йилнинг августида Россиянинг давлат қарзига қарши санкциялар жорий қилган эди. Чекловлар Россия давлат қарзи билан боғлиқ операцияларга қаратилган. Бундан ташқари, Америка банкларига рубль валютасида бўлмаган Россия давлат қарзларини банкка қўйишнинг бошланғич жараёнида иштирок этиш ва Россия ҳукуматига қарз бериш тақиқланган эди.
Британия ҳукумати Кимёвий қуролларни тақиқлаш ташкилоти орқали Россияга босим ўтказишни режалаштирмоқда. Улар Россияни тақиқланган моддалардан фойдалангани учун жавобгарликка тортишни хоҳламоқда. Агентлик маълумотларига кўра Буюк Британия ушбу чораларни Европадаги асосий иттифоқчилари, жумладан, Франция ва Германия билан муҳокама қилмоқда.
Аввалроқ АҚШ президенти Жо Байден 2014 йилда Қрим ва Украинадаги вазият муносабати билан Россияга қарши киритилган санкциялар муддатини узайтиргани ҳақида хабар берилганди.
2021 йил 2 март куни эса Евроиттифоқ ва АҚШ сиёсатчи Алексей Навальний билан боғлиқ вазият туфайли россиялик амалдорларга қарши санкциялар киритди. Россия Ташқи ишлар вазирлиги Евроиттифоқ ва АҚШнинг янги санкцияларини «Россияга қарши душманларча ҳамла» деб атади.
