AQSh va Buyuk Britaniya kimyoviy quroldan foydalangani uchun Rossiyaga qarshi yangi sanksiyalar joriy qilish masalasini muhokama qilmoqda. Oligarxlar va Rossiya davlat qarzi cheklovlar ostida qolishi mumkin, deb yozadi Bloomberg o‘z manbalariga asoslanib.
“Magnitskiy ro‘yxati” (Mamlakatga kirishi taqiqlangan shaxslar ro‘yxati) bo‘yicha sanksiyalar AQSh hukumati nazdida inson huquqlarini buzish yoki korrupsiya sxemalarida ishtirok etgan rossiyalik ishbilarmonlarga nisbatan qo‘llanishi mumkin. Ikki nafar rasmiyning Bloomberg nashriga bergan ma’lumotiga ko‘ra, agar Vashington yana bir bor Moskvani kimyoviy quroldan foydalanish taqiqini buzganlikda gumon qilsa, prezident Jo Bayden Rossiya milliy qarziga nisbatan sanksiyalar qo‘llash masalasini ko‘rib chiqadi.
Qo‘shma Shtatlar “Skripallar ishi” (Sovet, Rossiya va Buyuk Britaniya harbiy razvedkasi xodimi Sergey Skripal va uning qizi Yuliyaning zaharlanishi) doirasida 2019-yilning avgustida Rossiyaning davlat qarziga qarshi sanksiyalar joriy qilgan edi. Cheklovlar Rossiya davlat qarzi bilan bog‘liq operatsiyalarga qaratilgan. Bundan tashqari, Amerika banklariga rubl valyutasida bo‘lmagan Rossiya davlat qarzlarini bankka qo‘yishning boshlang‘ich jarayonida ishtirok etish va Rossiya hukumatiga qarz berish taqiqlangan edi.
Britaniya hukumati Kimyoviy qurollarni taqiqlash tashkiloti orqali Rossiyaga bosim o’tkazishni rejalashtirmoqda. Ular Rossiyani taqiqlangan moddalardan foydalangani uchun javobgarlikka tortishni xohlamoqda. Agentlik ma’lumotlariga ko’ra Buyuk Britaniya ushbu choralarni Yevropadagi asosiy ittifoqchilari, jumladan, Fransiya va Germaniya bilan muhokama qilmoqda.
Avvalroq AQSh prezidenti Jo Bayden 2014-yilda Qrim va Ukrainadagi vaziyat munosabati bilan Rossiyaga qarshi kiritilgan sanksiyalar muddatini uzaytirgani haqida xabar berilgandi.
2021-yil 2-mart kuni esa Yevroittifoq va AQSh siyosatchi Aleksey Navalniy bilan bog‘liq vaziyat tufayli rossiyalik amaldorlarga qarshi sanksiyalar kiritdi. Rossiya Tashqi ishlar vazirligi Yevroittifoq va AQShning yangi sanksiyalarini “Rossiyaga qarshi dushmanlarcha hamla” deb atadi.
Izoh (0)