Вьетнамда 2 ёшли қизча 12-қаватдан тушиб кетди. Уни курьерлик хизматида ишлайдиган йигит тутиб қолиб, ҳаётини сақлаб қолди. Бу ҳақда The Guardian нашри хабар қилди.
Қайд этилишича, Нгуен Нгок Ман исмли йигит машинада ўтирганида бола йиғиси ва аёл бақирганини эшитган. У нима бўлаётганини билиш учун машина ойнасидан қараганда деярли 50 метр баландликда турган болани кўради.
Курьер машинадан тушиб, бинога яқинлашади. Бола қулаганда Нгок Ман мувозанатни йўқотади, лекин қизчани ушлаб қолишнинг уддасидан чиқади.
«Мен қўлларимни иложи борича чўзишга ҳаракат қилдим ва уни ушлаш учун қўлимдан келганини қилдим», – дейди Нгок Ман. Унинг сўзларига кўра, у ҳеч бўлмаганда болани тўғридан-тўғри ерга тушишининг олдини олишга умид қилган.
«Бахтимга, чақалоқ менинг қучоғимга тушди. Мен уни қучоқладим, кейин унинг оғзидан қон кетаётганини ва жуда қўрққанини кўрдим», – дейди Нгок Ман.
Қизча касалхонага ётқизилган. Шифокорлар маҳаллий оммавий ахборот воситаларига маълумот беришича, қизчанинг оёғи чиқиб кетган, бундан бошқа жароҳат олмаган. Қутқарувчининг эса қўл мушаклари чўзилган.
Курьернинг сўзларига кўра, воқеадан кейин унинг ҳаёти «остин-устун бўлиб кетган». Ижтимоий тармоқларда ва оммавий ахборот воситаларида уни қаҳрамон деб аташмоқда, гарчи Нгок Манга бу жуда ёқмаса ҳам. У бундай вазиятда ҳар ким ҳам шундай қилиши мумкинлигини айтмоқда.
Унинг айтишича, кўпчилик унга совғалар бермоқчи бўлган, аммо у рад этган.
«Баъзи одамлар менга телефон рақами орқали пул юборишни бошлади. Бу мени безовта қилмоқда. Ўзим ишлаб тополмаган пулни олишни истамайман», – деди у. Нгок Ман қизча касалхонадан чиққандан сўнг уни кўргани боришини айтди.
Бундан аввал АҚШда ҳеч ким боқиб олишни хоҳламаган ит янги эгасининг ҳаётини сақлаб қолгани, Россияда 6 ёшли қизча тўртинчи қаватдан йиқилиб тушиб, омон қолгани ҳамда Хитойда 61 ёшли Британия консули чўкаётган қизни қутқаргани ҳақида хабар берилганди.
Изоҳ (0)