Россия ва Суриянинг идоралараро мувофиқлаштирувчи штаби қўшма баёнот чиқариб, АҚШни суриялик жангариларга гуманитар ёрдам кўрсатишда айблади. Унга кўра, гўёки Қўшма Штатлар БМТдан Рукбан қочқинлар лагери аҳолиси учун гуманитар ёрдам олиб, уни Вашингтон назорати остидаги жангариларга ўтказмоқда. Бу ҳақда «Коммерсантъ» хабар берди.
«Қўшма Штатлар лагер аҳолисига гуманитар ёрдам етказиб бериш зарурати мавзусини мунтазам равишда кўтариб, БМТ раҳбариятига босим ўтказиш учун мавжуд вазиятдан фойдаланмоқда. Шу билан бирга, америкаликлар аслида ушбу ёрдамдан ҳудудда фаолият юритаётган ўз назоратлари остидаги жангариларни таъминлаш учун фойдаланишни мақсад қилган, ва аслида, улар аввал ҳам бир неча бор шундай қилган»,— дейилади баёнотда.
Москва ва Дамашқ Вашингтонни «АҚШ босиб олган ҳудуд ва унинг ичида жойлашган Рукбан лагерида содир бўлаётган барча нарсалар» учун жавобгар қилди. Жавобгарликда хусусан, Сурия ҳукумати назоратига қайтарилгунга қадар аҳолини сув, озиқ-овқат ва энг зарур нарсалар билан таъминлаш назарда тутилмоқда.
Эслатиб ўтамиз, 26 февралга ўтар кечаси АҚШ Сурияда Дамашқни қўллаб-қувватловчи эронпараст кўнгиллилар қўшини билан боғлиқ бинога авиазарба берди. Маълумотларга кўра, зарба мудофаа хусусиятига эга бўлган ва февраль ойида кўнгиллилар қўшини томонидан Америка ҳарбийларига уюштирилган учта ҳужумга жавоб бўлган.
Шундан кейин Эрон АҚШнинг Яқин Шарқдаги ҳаракатлари минтақадаги зўравонликни кучайтириши мумкинлигидан хавотир билдирди. АҚШнинг Суриядаги Эронга алоқадор объектларга ҳаво зарбасини бериши минтақадаги зўравонликларни янада кучайтириб юбориши мумкин, деди Эрон президент аппарати ҳузуридаги Стратегик тадқиқотлар маркази халқаро лойиҳасининг директори Диако Ҳусайний.
Изоҳ (0)