Давлатобод тумани маданият саройида халқ депутатлари Наманган вилоят, шаҳар ва туман кенгашларининг Олий Мажлис Сенати аъзоси сайлови бўйича қўшма мажлиси бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Мажлис ишида маҳаллий кенгашлардан сайланган 389 нафар депутат иштирок этди. Унинг кун тартибига битта масала — бўшаб қолган ўринга Олий Мажлис Сенати аъзосини сайлаш масаласи киритилди.
Шаҳар-туман кенгашлари депутатларидан иборат маслаҳат кенгаши қўшма мажлис муҳокамасига 6-Сероб сайлов округидан халқ депутатлари вилоят кенгаши депутати, вилоят ҳокими Шавкатжон Абдураззоқов номзодини яширин овоз бериш учун бюллетенга киритишни таклиф қилди.
Мазкур таклиф маъқулланди ва яширин овоз бериш жараёни бошланди.
Шундан сўнг саноқ комиссиясининг ҳисоботи тингланди. Унга кўра, Шавкатжон Абдураззоқов Олий Мажлис Сенати аъзоси этиб сайланди.
Депутатлар овоз бериш натижаларини тасдиқлади.
«Сенаторлик жуда юксак мақом, ушбу мақом эгасига қўшимча масъулият юклайди. Бугун менга билдирилган ишончни оқлаш, халқимизга садоқат билан хизмат қилиш учун бор кучимни сарфлайман», — деди Шавкатжон Абдураззоқов.
Мавзуга доир: Бухоро вилояти ҳокими Ботир Зарипов сенатор бўлди
Изоҳ (0)