Бугунги кунда Ўзбекистонда барча соҳалар қатори узумчилик соҳасида ҳам туб бурилишлар ясалди. Юртимиз мустақилликка эришгунга қадар бўлган даврда Ўзбекистонда 100-110 минг гектар токзорлар мавжуд бўлган бўлса, мустақилликдан кейин 30-40 минг гектар ерга янги ток кўчатлари экилди. Янги токзорлар барпо этилди.
Аммо шу оралиқдаги 3-4 йил бу соҳа учун жуда самарали келди десак муболаға бўлмайди. Ўтган 2020 йилда республика ҳудудларида фермер ва қишлоқ хўжалиги корхоналари томонидан 22,6 минг гектар майдонда янги токзорлар барпо этилди. Шунингдек, 4,3 минг гектар майдондаги токзорлар реконструкция қилинди.
Жорий йилда республиканинг лалми ва фойдаланишдан чиққан 79,1 минг гектар майдонларида янги токзорлар барпо этилиб, 12,6 минг гектар майдондаги эски иқтисодий самарасиз токзорлар реконструкция қилинади.
Ушбу майдонларда ташкил қилинадиган токзорларга ҳар томонлама сифатли, сертификатланган, турли хил вирусли касаллик ва зараркунандалардан холи ток кўчатларини етказиб бериш энг долзарб масаладир.
Мазкур масалани ҳал этиш ва сертификатланган, турли хил вирусли касаллик ва зараркунандалардан холи 35-40 миллион туп ток кўчатларини тайёрлаб бериш мақсадида республиканинг Тошкент, Наманган, Самарқанд вилоятларида 5 та комплекс ток кўчатхоналарини ташкил этиш режалаштирилаяпти.
Ҳозирги кунда минтақадаги миллий ампелографик коллекцияларини сақлаш ва кенгайтириш, стресс омилларга чидамли, сифатли, сертификатланган ток кўчатларини етиштириш мақсадида In vitro шароитида микроклонлаш услубида пайвандланган ток кўчатларини етиштириш ишлари йўлга қўйиляпти. Жумладан, Тошкент вилоятининг Қибрай туманида «De Nova Agro» МЧЖ томонидан 1 миллион дона пайвандтагларни In vitro шароитида етиштириш йўлга қўйилди.
Шу билан бирга, Тошкент вилоятининг Паркент туманидаги «Деярли Мавлоно» ф/х, «Гулбоғ Бурхон» фермер хўжаликлари, Самарқанд вилояти Самарқанд тумани «Gold Line Eco Agro Service» МЧЖ, Қибрай туманидаги «Botanik treye» МЧЖ негизидаги ток кўчатхоналарида оналик ток плантацияларини ташкил этиш ва техник навли узумларнинг оналик майдонларини яратиш учун ер майдонларини аниқлаш ишлари олиб борилмоқда.
Шунингдек, мазкур тадбирлар доирасида ҳозирда агентлик билан ҳамкорликда Самарқанд вилоятининг Жонбой туманидаги «Охалик олтин боғи меваси» МЧЖ томонидан четдан интродуксия қилинган Rkatsiteli, Fiano, Viogner, Kaberne Sovinyon, Sira, Primitivo, Montepulitsiano, Saperavi, Risling, Shardone каби истиқболли техник узум навларидан янги технологиялар асосида 2 миллион дона ток кўчатлари тайёрланди. Греция технологияси асосида фаолият олиб бораётган ушбу кўчатхона шу кунга қадар 3 миллион евро ҳисобида инвестиция киритгани ва 45 нафар ишчи учун доимий иш ўрни яратгани қувонарли ҳолдир.
Янги токзорлар барпо қилаётган талабгорларга енгиллик яратиш мақсадида, Ўзбекистон Республикаси Вазирлар Маҳкамасининг 2020 йил 30 ноябрдаги 753-сонли қарори билан агентлик жамғармаси ҳисобидан In vitro шароитида етиштирилган ток кўчатларини сотиб олиш харажатларининг бир қисмини қоплаш учун бир дона ток кўчатига тўрт минг сўмдан ортиқ бўлмаган миқдорда субсидиялар ажратилиши белгиланган.
Бу борада агентлик тарғибот ва тушунтириш ишларини олиб борибгина қолмай, ташаббускорларни ҳар томонлама қўллаб-қувватлаш учун жонбозлик кўрсатиб келмоқда. Бу йил кўчатхоналарни ташкил қилиш, жиҳозлаш ва самарадорлигини ошириш мақсадида 1 миллиард сўм миқдорида субсидия ажратиш режалаштирилган.
Агентлик томонидан ташаббускор ва фермерлар учун ўтган йил давомида 80 дона қудуқ қазиш учун 11 миллиард 800 миллион сўм, 2929.6 гектар ерни томчилатиб суғориш учун эса 23 миллиард 838 миллион сўм миқдорида субсидия ажратилди.
Ўзбекистон Республикаси Алкоголь ва тамаки бозорини тартибга солиш ҳамда виночиликни ривожлантириш агентлиги
Реклама ҳуқуқи асосида.
Изоҳ (0)