Бугун,

  • USD 10940.05
  • RUB 182.26
  • EUR 11121.65

Пойтахтда Олий ва ўрта махсус таълим вазирлиги ҳамда University of Tashkent for Applied Sciences масъулияти чекланган жамиятининг нодавлат таълим хизматларини кўрсатувчи Тошкент амалий фанлар университети очилиши кутилмоқда. Бу ҳақда ҳукуматнинг жамоатчилик муҳокамаси учун эълон қилинган тегишли қарори лойиҳасида қайд этилган.

Фото: «Дарё»

Фото: «Дарё»

Ҳужжатда айтилишича, университетнинг асосий вазифаси Ўзбекистон олий таълим дастурлари билан бирга дунёнинг нуфузли хорижий олий таълим муассасаларининг, жумладан, QS World University Rankings ва The Times Higher Education World University Rankings рейтингидаги дунёнинг 1000 таликка кирувчи Гринвич университети, Марказий Ланкашир университети (Буюк Британия) ҳамда бошқа етакчи хорижий олий таълим муассасаларининг таълим дастурларини жорий этиш, уларнинг малакали профессор-ўқитувчилари, олим ва мутахассисларини ўқув жараёнига жалб қилишдир.

Университетда таълим фаолияти 2021/2022-ўқув йилидан бошланади ва ўқиш амалда мавжуд таълим шакллари ҳамда ўзбек, рус ва инглиз тилларида амалга оширилади.

Ушбу ОТМда дастлабки босқичда талабалар Бизнес ахборот тизимлари, Бизнес бошқаруви, Ахборот хавфсизлиги ҳамда Электрон тижорат бакалавриат таълим йўналишлари бўйича қабул қилинади.

Таълим олиш тўлов-контракт асосида, шунингдек, юридик шахслар — потенциал иш берувчилар томонидан тақдим этиладиган таълим грантлари, шунингдек, ёшларни ўқитиш учун ажратиладиган юридик ва жисмоний шахсларнинг ҳомийлик хайриялари ҳамда қонун ҳужжатларида тақиқланмаган бошқа манбалар ҳисобига амалга оширилади.

Университетда таълим замонавий таълим технологияларидан фойдаланган ҳолда кундузги, сиртқи, махсус сиртқи, кечки ва масофавий таълим шаклларида олиб борилади.

Битирувчиларга Ўзбекистоннинг олий маълумот тўғрисидаги давлат намунасидаги дипломи берилади.

Эслатиб ўтамиз, олий таълим соҳасида соғлом рақобат муҳитини шакллантириш, олий таълим билан қамраб олиш даражасини ошириш мақсадида Ўзбекистоннинг ҳар бир ҳудудида 2021 йил 1 сентябргача камида биттадан нодавлат ОТМ очилиши маълум қилинган.

Аввалроқ Тошкентда Япония рақамли университети ташкил этилиши, пойтахтда Санкт-Петербург давлат университети филиали очилиши ҳақида хабар берилган эди.

Изоҳ
Асосий янгиликлар