Ўзбекистон мустақилликка эришганидан (1991 йилда) ҳеч қанча ўтмасдан футбол терма жамоаси Хиросимада (Япония) ўтказилган 1994 йилги ёзги Осиё ўйинларида ғалаба қозонади. Шундан сўнг ўзбекистонлик футболчиларнинг легионер сифатидаги фаолияти ҳам бошланиб кетади. Ҳозир ҳам ўзбекистонлик футболчиларнинг легионер сифатидаги фаолияти кундан кунга ўз географиясини кенгайтириб бормоқда. Бугунги кунда 20 дан ортиқ ўзбекистонлик футболчилар легионер сифатида Осиё ва Европа клубларида фаолият олиб бормоқда. «Дарё» қуйида ўзбек легионерлари ҳақида материал (Transfermarkt маълумотларига кўра) тайёрлади.
Корея ярим оролидаги ўзбек футболчилари
Ўзбекистон терма жамоасининг Осиё қитъасидаги асосий рақобатчиларидан бири бўлган Жанубий Корея сўнгги йилларда ўзбекистонлик футболчиларни ўз чемпионатига жалб эта бошлади. Айни пайтда Кореяда 6 нафар ўзбекистонлик тўп тепмоқда. Булар: Олег Зотеев («Чоннам Драгонс»), Жамшид Искандаров («Соннам»), Икром Алибоев («Сеул»), Рустам Ашурматов «Канвон», Ислом Кенжабоев («Чежу Юнайтед»), шунингдек, ҳозирда эркин агент мақомида бўлиб турган Достон Турсунов ҳам 2019/20 йилги мавсумни Кореяда ўтказди.
Зотеев 2020 йилги мавсумдан бошлаб қуйи лига вакили «Чоннам Драгонс» клуби шарафини ҳимоя қилмоқда. «Пахтакор» ва «Локомотив»даги ўйинлари орқали яхши танилган Искандаров эса 2020 йилнинг январь ойидан бери «Соннам» шарафини ҳимоя қилиб келмоқда. Жамшид жамоаси сафида Кей Лигада 18 та ўйин ўтказиб, 1 та голга ассистентлик қилди.
2019/20 йилги мавсумда деярли ўйин амалиётисиз қолиб кетган Икром Алибоев 2019 йилнинг январь ойидан бери «Сеул» жамоаси аъзоси ҳисобланади. Пойтахтликлар билан шартномаси 2021 йилнинг охирида якунига етадиган футболчи Корея чемпионати баҳсларида 42 та ўйин ўтказиб, 3 та гол ва 5 та голли узатма муаллифига айланган.
2019 йилнинг февралидан бошлаб «Кванжу» сафида тўп тепган ва 2019/20 йилги мавсумда нисбатан ишончлироқ ўйин кўрсатган (20 ўйин, 1 тадан гол ва ассист) Рустам Ашурматов эса янги мавсумни «Канвон» жамоасида бошлайди. Рустам янги жамоаси билан 2022 йилнинг якунига қадар мўлжалланган шартнома имзолади.
Қаршининг «Насаф» клубида порлаган Ислом Кенжабоевни 2021 йилнинг февраль ойида «Чежу Юнайтед» клуби ўз сафига қўшиб олди. Ислом ҳозирда янги жамоаси билан мавсумга тайёргарлик кўрмоқда.
2019/20 йилги мавсумни «Пусан ай Парк» жамоасида ўтказиб, 15 та ўйинда 1 та гол урган ҳимоячи Достон Турсунов эса кўра айни дамда эркин агент бўлиб турибди.
Тай ўлкасидаги Артём Филипосян ва Сардор Мирзаев
Ўз вақтида «Бунёдкор», «Насаф», «Бухоро» клубларида ҳаракат қилган Артём Филипосян 2018 йилдан бери ўз омадини Таиланд ва Индонезия томонларда ахтариб юрибди. Ҳозирда футболчи Таиланднинг «Прачуап» клубида фаолият юритмоқда. Унинг тай клуби билан амалдаги шартномаси 2021 йилнинг май ойида ўз ниҳоясига етади.
Сардор Мирзаев ҳам «Локомотив»даги узоқ йиллик фаолиятидан (2015–2020 йиллар) сўнг 2020 йилнинг февраль ойида Таиланднинг «Муангтонг Юнайтед» клубига йўл олди. Сардорнинг амалдаги клуби билан шартномаси 2023 йилгача амал қилади. Мирзаев Таиланд чемпионатида 17 ўйинда майдонга тушиб, 6 та гол урди ва 3 та голга ассистентлик қилди.
БААдаги ярим ҳимоячилар
2018 йилнинг январь ойида БААнинг «Шаржа» клубига йўл олган Отабек Шукуров шу пайтга қадар Амирликлар чемпионатида умумий ҳисобда 62 та ўйинда 6 та гол ва 5 та ассист қайд этган.
2020 йилнинг февраль ойида «Шабоб Аҳ-Аҳли» «Насаф»дан Азиз Ғаниевни сотиб олди. Азиз янги жамоасига тезда мослашиб кетди ва асосий таркиб футболчиларидан бирига айланди – 15 ўйин, 1 та гол ва 4 та голли узатма. Аммо Азиз 12 февраль, шанба куни БАА чемпионатининг 16-туридан ўрин олган «Шабоб Ал-Аҳли» ва «Ал-Ваҳда» ўртасидаги баҳсда жароҳат олиб, узоқ муддатга сафдан чиқди. Унинг «Шабоб Ал-Аҳли» билан амалдаги шартномаси 2022 йилда ўз ниҳоясига етади.
Ўзбекистон Суперлигасининг охирги йиллардаги энг ёрқин ўйинчиси бўлган Жалолиддин Машариповни Саудия Арабистонининг «Ан-Наср» клуби «Пахтакор»да сотиб олди. Легионерларга бўлган чеклов туфайли саудияликлар Машариповни қайдномадан ўтказа олмади ва Азиз Ғаниев ҳаракат қилаётган «Шабоб Аҳ-Аҳли»га ёзга қадар ижарага берди.
«Пахтакор» етакчиларидан яна бири Достон Ҳамдамов эса «шерлар» билан шартномаси ўз ниҳоясига етгач, эркин агент сифатида БАА чемпионатига йўл олди. Дубайнинг «Ан-Наср» клуби билан 1,5 йиллик шартнома имзолаган Достон ҳам янги жамоасида кўп вақт ўтказмади. «Ан-Наср» уни мавсум сўнггигача аутсайдер «Ҳатта»га ижарага бериб юборди.
Беларусдаги Шаҳбоз Умаров ва Шаҳзод Убайдуллаев
2019/20 йилги мавсумда «Энергетик-БГУ»да порлаган Шаҳбоз Умаров янги мавсумни мамлакатнинг номдор клубларидан бир БАТЭда бошлади. Шаҳбоз ҳозиргача Беларусь Олий Лигасида 30 та ўйин ўтказиб, 4 та гол ва 3 та ассистни амалга оширди.
Беларуснинг амалдаги чемпиони «Шахтёр» эса янги мавсум олдидан ўз сафига «Металлург» ҳужумчиси Шаҳзод Убайдуллаевни қўшиб олди. Солигорск клуби Ўзбекистон терма жамоасига номзод саналган футболчига катта умид билдираётгани айтилмоқда.
Польшага йўл олган Жасур Яхшибоев
«Пахтакор»нинг собиқ мураббийи Шота Арвеладзе билан муроса қилолмагани учун ижара асосида «Энергетик-БГУ»га юборилган Жасур Яхшибоев Беларусда яхшигина шов-шув кўтара олди. 2019/20 йилги мавсумнинг биринчи ярмини Шаҳбоз Умаров билан «Энергетик-БГУ»да ўтказган Жасур иккинчи давра аввалида «Шахтёр»га (ижара асосида) йўл олди ва якунда солигорскликлар билан чемпионликни тантана қилди. 2021 йилнинг февраль ойида эса унинг трансфер ҳуқуқини Польшанинг «Легия» клуби сотиб олди. Томонлар 2023 йилгача амал қиладиган шартнома имзолаган.
Россиядаги Вагиз Галиулин ва Остон Ўрунов
Фаолиятининг катта қисмини Россияда ўтказаётган Вагиз Галиулиннинг амалдаги клуби «Нефтьэхимик» бўлиб турибди. Қуйи лигада ҳаракат қиладиган «Нефтьэхимик» ва Вагиз ўртасидаги шартнома 2021 йилнинг 30 июнида ўз ниҳоясига етади. Галиулин 2020/21 йилги мавсумда 21 та ўйин ўтказиб, 3 та гол урди ва 1 та голга ҳаммуаллифлик қилди.
Тошкентнинг «Локомотив» клубидан «Уфа»га ўтган Остон Ўрунов қисқа муддат ичида ўзини яхши томондан кўрсатиб, Россиянинг энг номдор клубларидан бири «Спартак»ка ўтди. Бироқ Остонга пойтахт клубида асосий таркибга кириш осон кечмаяпти. 2020/21 йилги мавсумда Остон «Спартак» таркибида барча мусобақаларда 9 та ўйин ўтказиб, 1 та гол урди. Унинг москваликлар билан амалдаги шартномаси 2025 йилга қадар мўлжалланган.
2020 йилда Москванинг бошқа бир клуби «Локомотив» «Бунёдкор»дан Жасур Жалолиддиновни сотиб олди. Бироқ «темир йўлчилар» Жасурга бирорта ҳам ўйин ўтказишга имкон бермасдан «Тамбов»га ижарага бериб юборди. «Тамбов» сафида эса Жасур Россия Кубоги доирасида ўтказилган ўйинда бор-йўғи 44 дақиқа ҳаракат қилди. Шундан сўнг «Локомотив» ва футболчи ўртасида тузилган шартнома бекор қилинди. Ҳозирда Жасур Жалолиддинов эркин агент мақомида.
Чин ўлкасидаги Одил Аҳмедов ва Ислом Тўхтахўжаев
2011 йилдан бери легионер сифатида «Анжи», «Краснодар» ва «Шанхай-СИПГ» каби жамоаларда ўйнаган Одил Аҳмедов айни пайтда Хитойнинг «Тяньцзинь Тэда» клуби шарафини ҳимоя қилмоқда. Шанхайликлар Ўзбекистон терма жамоаси сардорини мавсум якунига қадар ижарага берган. Одил шу вақтга қадар Хитой Суперлигасида умумий ҳисобда 67 та ўйинда майдонга тушиб, 9 тадан гол ва ассистга муаллифлик қилган.
2020 йилнинг январь ойида Хитойнинг қуйи лигасида ҳаракат қиладиган «Шэнянь Урбан» клубига ўтган Ислом Тўхтахўжаев ҳозирга қадар ушбу жамоада 12 та ўйинда қатнашиб, 2 та гол урди. Унинг Хитой клуби билан шартномаси 2021 йилнинг декабрида ўз ниҳоясига етади.
Италия А Сериясидаги Элдор Шомуродов
2017 йилда «Бунёдкор»дан «Ростов»га ўтган Элдор Шомуродов 2020 йилнинг октябрь ойида Италиянинг «Женоа» клубига трансфер қилинди. Шу тариқа Элдор Италия А Сериясида тўп тепган иккинчи (бунгача Илёс Зейтуллаев ҳам Италия чемпионатида ҳаракат қилган) ўзбекистонлик ўйинчига айланди. Генуяликлар билан 2024 йилнинг ёзигача мўлжалланган шартнома имзолаган Шомуродов ҳозиргача барча мусобақаларда 16 та ўйин ўтказиб, 2 та гол ва 2 та голли узатма муаллифига айланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)