Ургутдаги «Жартепа» чегара божхона пости талабалар учун очилди
Талабаларга Тожикистон билан чегарада жойлашган «Жартепа» чегара божхона пости орқали ҳаракатланишга рухсат берилди. Бу ҳақда Самарқанд вилояти божхона бошқармаси маълумотларига асосланиб Zarnews хабар бермоқда.
Қайд этилишича, талабалар 17 февралдан бошлаб Ургут туманида Тожикистон билан чегарада жойлашган «Жартепа» чегара божхона пости орқали ҳаракатланишлари мумкин.
Пандемия сабабли талабалар Тожикистонга фақатгина «Сариосиё», «Ойбек» ва «Плотина» чегара ўтказиш пунктлари орқали ҳаракатланиши мумкин эди.
Эслатиб ўтамиз, январь ойи бошида «Жартепа» назорат-ўтказиш пункти Самарқанд вилоятида фаолият кўрсатаётган корхоналарнинг экспорт-импорт операциялари учун очилганди.
Бундан аввал Тожикистонда таҳсил олаётган ўзбекистонлик талабаларнинг мамлакатга киришига рухсат берилгани ҳамда Ўш—Тошкент йўлининг Хўжанддан ўтган қисми очилиши мумкинлиги ҳақида хабар берилганди.
