ЖАР AstraZeneca’нинг бир миллионта вакцинасини қайтариб беради

Жанубий Африка Республикаси (ЖАР) AstraZeneca’нинг коронавирусга қарши 1 миллион доза вакцинасини Ҳиндистон зардоб институтига қайтариб беришни режалаштиряпти. Бу ҳақда Economic Times нашри 16 февраль, сешанба куни хабар берди.

Ҳукумат расмийлари мамлакатда коронавируснинг кенг тарқалган 501Y.V2 вариантидан юзага келадиган касалликнинг енгил ва ўртача шаклларида препаратнинг самараси пастлигини бунга сабаб қилиб кўрсатди.

Шунингдек, яқин ҳафталарда мамлакатга яна 500 минг доза вакцина келтирилиши керак.

Аввалроқ ЖАР соғлиқни сақлаш вазири Звелини Мкизе аҳолини коронавирусга қарши эмлашни AstraZeneca инглиз-швед компаниясининг препаратлари билан бошланишини айтган эди.

Маълумот учун, тадқиқотлар AstraZeneca вакцинаси вируснинг «африкача» штаммидан фақат 10 фоизга ҳимоя қилишини аниқлади.

Бу янгиликдан кейин ЖАР вакцинадан фойдаланишни тўхтатди, чунки мамлакатда тарқалган вируснинг 90 фоизини «африкача» штамм ташкил қилади.