Xitoy milliy kosmik boshqarmasi (CNSA) Marsning oq-qora rangli suratini e’lon qildi. Unda Marsning geologik o‘ziga xosligi, xususan, Skiaparelli krateri va Mariner vodiysi tasvirlangan, deb xabar beradi Hi-Tech.Mail.ru.
Kadr Marsdan taxminan 2,2 million kilometr uzoqlikdan suratga olingan. Kosmik apparat 197 kundan buyon parvoz qilmoqda va bir necha oydan so‘ng (aprel—may) u sayyoraga qo‘nishi amalga oshirish hamda tadqiqotlarni boshlashi lozim.
Eslatib o‘tamiz, “Tyanven-1” marsoxodi NASA’ning yangi marsoxodi bilan deyarli bir vaqtda uchirilgan edi: Xitoy zondi 2020-yilning 23-iyulida uchirilgan bo‘lsa, Perseverance 30-iyulda uchirilgan edi.
Ikkala apparat ham sayyoraning geologik tuzilmasini, yuza qatlam tarkibini va Marsdagi muzliklarning taqsimlanishini o‘rganadi. Shuningdek, ular yordamida elektromagnit va gravitatsion maydonlarning o‘ziga xosligi o‘rganiladi. Bu “Qizil sayyora”ning iqlimi haqida ko‘proq ma’lumot olishga yordam beradi.
Eslatib o‘tamiz, 2020-yilning dekabrida Xitoyning “Chane-5” avtomatik stansiyasi Oy yuzasidan yig‘ib olingan tuproq namunalari solingan kapsulani Yerga yuborgandi.
Izoh (0)