Шаҳзодани қаердан топиш мумкин? Қироллик оиласи вакиллари турмуш ўртоғи билан қандай танишган?

Инсон ўз бахтини қачон ва қаерда топиши номаълум. Аммо бир нарса аниқ, ҳар қандай тасодифий учрашувлар бир умрлик ва жиддий муносабатларга сабабчи бўлиши мумкин.

Шаҳзода Уильям ва Кейт Миддлтон

Жуфтлик Сент-Эндрюсс университетининг биринчи курсида ўқиётган вақтида танишган. Кейт самимий табассуми ва мафтункорлиги билан шаҳзода эътиборини тортган. 10 йилдан ортиқ вақт давомида жанжаллашиб, қайта ярашиб юрган жуфтлик муносабатларини никоҳ билан мустаҳкамлашга қарор қилган.

Шаҳзода Гарри ва Меган Маркл

Умумий дўстлари томонидан таклиф қилинган зиёфатда учрашган жуфтлик суҳбат давомида яхши чиқишиб, эртаси куни кўришишга аҳдлашган. Бир ярим йил учрашиб юргандан кейин унаштирилган ва яна ярим йил ўтиб оила қурган.

Шаҳзода Чарльз ва Камила Паркер-Боулз

Диана билан учрашгунига қадар Камила Чарльзнинг яхши кўрган қизи бўлган. Улар 1970 йил поло мусобақасида танишган. Бундан хабар топган қиролича ушбу севги ҳикоясига нуқта қўйиш учун ўғлини денгиз ҳарбий хизматига жўнатган. Камилла эса Эндрю Паркер-Боулзга турмушга чиққан. Чарльз Дианага уйланганидан кейин ҳам учрашишда давом этган жуфтлик «қалблар маликаси»нинг вафотидан кейин 2005 йилда турмуш қурган.

Шаҳзода Чарльз ва Диана Спенсер

Жуфтлик Чарльз булдуруқ ови учун Спенсерларга қарашли ерга борганида танишган. Бу вақтда Диана 16, шаҳзода Чарльз эса 28 ёшда бўлган. Улар тўйига қадар бир-йўғи 13 марта учрашган.

Қиролича Елизавета II ва шаҳзода Филипп

Қиролича 13 ёшида 18 ёшли Филипп билан танишган. Филипп Елизавета ва унинг синглиси Маргарет учун денгиз қироллик коллежида экскурсия ташкил қилган. Дўст сифатида учрашиб юрганидан кейин ўрталарида илиқлик пайдо бўла бошлаган. Қиролича 21 га кирганидан кейин эса 1947 йилда унаштирув, кўп ўтмай эса тўй маросими бўлиб ўтган.

Малика Анна ва Марк Филипс

Қироличанинг қизи бўлажак турмуш ўртоғи билан от миниш мусобақасида танишган. 1973 йилда турмуш қурган жуфтлик орадан 20 йил ўтиб муносабатларига нуқта қўйган.

Шаҳзода Эдвард ва Софи Риз-Жонс

Қироличанинг кичик ўғли бўлажак рафиқаси билан 1987 йилда меҳмонга борганида танишган. Кейинги учрашув эса 1993 йилда хайрия тадбирида бўлган ва жуфтлик бир-бирини ёқтириб қолган. Орадан 6 йил ўтиб эса турмуш қурган.